ព្យុះមហាសែនវាយបក់ឆ្នេរបងក្លាដែស នៅពេលភូមាកំពុងចាប់ជម្លៀសប្រជាជន
ខ្យល់ព្យុះមហាសែនបានបោកបក់ទៅលើប្រទេស បង់ក្លាដែស នៅព្រឹកថ្ងៃព្រហស្បតិ៍ ទី ១៦ ឧសភា ដោយចាប់ផ្តើមដំបូងពីឆ្នេរសមុទ្រដែលស្ថិតនៅភាគខាងត្បូងប្រទេស។ តាមអាជ្ញាធរបង់ក្លាដែស មានមនុស្ស៤នាក់រងគ្រោះស្លាប់ នៅក្នុងគ្រោះ ខ្យល់ព្យុះ លើកនេះ។ បន្ទាប់ពីបង់ក្លាដែស ខ្យល់ព្យុះមហាសែន Mahasen។
យោងតាមអាជ្ញាធរបង់ក្លាដែស កម្លាំងខ្យល់ព្យុះបានចុះខ្សោយ នៅពេលបោកបក់មកដល់ដីគោក គឺបក់ក្នុងល្បឿន ១០០គីឡូម៉ែត្រក្នុងមួយម៉ោង។ ទំហំខូចខាត ជាពិសេសការបាត់បង់ជីវិតមិនសូវធ្ងន់ធ្ងរ ដោយសារ រដ្ឋាភិបាលបានជម្លៀស ប្រជាជនជាង ៩សែននាក់ ចេញពីតំបន់ដែលខ្យល់ព្យុះត្រូវឆ្លងកាត់។ ប៉ុន្តែ យ៉ាងណាក៏ដោយ រដ្ឋាភិបាលបង់ក្លាដែស នៅតែប្រកាសអាសន្នកម្រិតខ្ពស់ គឺលេខ ៧ សម្រាប់តំបន់ទំនាបមួយចំនួន។
នៅថ្ងៃនេះ ដោយសារតែខ្យល់ព្យុះមហាសែន កំពង់ផែ ដ៏រវល់ជាងគេរបស់បង់ក្លាដែស និងរមណីយដ្ឋានទេសចរណ៍ ក្នុងខេត្តChittagong ត្រូវបន្តបិទទ្វារ ចំណែក សាលារៀន និងសណ្ឋាគារមួយចំនួនត្រូវបានប្រែក្លាយជាជំរកទទួលជនភៀសខ្លួន។
ងាកទៅមើលប្រទេសភូមាវិញ ដែលនឹងត្រូវទទួលរងបោកបក់របស់ព្យុះមហាសែន អាជ្ញាធរកំពុងប្រញឹកដៃជើងដើម្បីជម្លៀសប្រជាជនចេញពីរដ្ឋរ៉ាគីន ដែលខ្យល់ព្យុះត្រូវឆ្លងកាត់។ ប៉ុន្តែ អ្វីជាបញ្ហាប្រឈមខ្លាំង គឺក្នុងចំណោមប្រជាជនដែលត្រូវជម្លៀសចេញ ប្រមាណ ជាង១សែន ៦ម៉ឺននាក់នោះ មានប្រជាជនរ៉ូហ៊ីងហ្គាដល់ទៅជាង ១សែន ៤ម៉ឺននាក់រួចទៅហើយ។ ប្រជាជនរ៉ូហីងហ្គាដែលបានភៀសខ្លួនម្តងហើយ ដោយសារតែអំពើហិង្សា ក្នុងជម្លោះសាសនាជាមួយជនជាតិភូមា កាន់សាសនាព្រះពុទ្ធ ពេលនេះកំពុងរស់នៅក្នុងជំរំភៀសខ្លួនក្នុងរដ្ឋរ៉ាគីន។ ពួកគេបានតវ៉ាមិនចង់ចាកចេញពីជំរំទៅតាមការអំពាវនាវរបស់រដ្ឋាភិបាលភូមា ទេ។ ពួកគេបារម្ភខ្លាចក្រែងថា រដ្ឋាភិបាលភូមានឹងជម្លៀសពួកគេទៅឆ្ងាយ នឹងមិនអាចត្រលប់មកទឹកដីកំណើតរបស់ពួកគេវិញ។
គួររំលឹកថា ចាប់តាំងពីមានអំពើហិង្សាក្នុងជម្លោះសាសនា ដែលបានបណ្តាលឲ្យមានមនុស្សស្លាប់ជាង២០០ កាលពីឆ្នាំ ២០១២ ជនជាតិរ៉ូហ៊ីងហ្គាបានត្រូវគេប្រមូលឲ្យរស់នៅក្នុងជំរំក្នុង រដ្ឋរ៉ាគីន ដោយមិនដឹងពីអនាគតរបស់ពួកគេនឹងក្លាយជាយ៉ាងណា។ ប៉ុន្តែ រដ្ឋាភិបាលភូមាធ្លាប់បានបញ្ជាក់ហើយថា ជនជាតិរ៉ូហីងហ្គាទាំងនោះជាជនអន្តោប្រវេសន៍ ដែលមករស់នៅ ខុសច្បាប់ក្នុងទឹកដីភូមា៕ដោយ ឈាង បុប្ផា (RFI)
