អតីតប្រធានាធិបតីអេហ្ស៊ីប ម័រស៊ីប្រឈមនឹងការកាត់ទោស
ទូរទស្សន៍រដ្ឋរបស់អេហ្ស៊ីបបាន ផ្សាយអោយដឹងនៅថ្ងៃអាទិត្យម្សិលមិញថា លោកអតីតប្រធានាធិបតី មូហាម៉េត ម័រស៊ី ដែលកំពុងត្រូវឃុំខ្លួនដោយក្រុមយោធា នឹងត្រូវប្រឈមមុខនឹងការកាត់ទោស។ ជាការកាត់ទោសក្នុងបទចោទប្រកាន់ទាក់ទងនឹងការញុះញង់អោយមាន អំពើឃាតកម្មនៅក្នុងការប្រឈមមុខដាក់គ្នារវាងក្រុមអ្នកគាំទ្រ និងអ្នកប្រឆាំងរូបលោក កាលពីខែធ្នូឆ្នាំ២០១២។
អតីតប្រធានាធិបតីអេហ្ស៊ីបដែលត្រូវបានក្រុមយោធា ទម្លាក់ពីអំណាចកាលពីថ្ងៃទី៣កក្កដាកន្លងទៅនោះ នឹងត្រូវប្រឈមនឹងការកាត់ទោសដែលទាក់ទងនឹងបទចោទញុះញង់ អោយមានអំពើហិង្សា និងឃាតកម្ម។ បណ្តាញទូរទស្សន៍រដ្ឋអេហ្ស៊ីបបានផ្សាយដំណឹងនេះកាលពីថ្ងៃអាទិត្យ ម្សិលមិញ ប៉ុន្តែមិនបានបញ្ជាក់អំពីកាលបរិច្ឆេទនៃសវនាការនោះឡើយ។ បទចោទដែលត្រូវបានធ្វើចំពោះលោកម័រស៊ី គឺទាក់ទងនឹងព្រឹត្តិការណ៍ប៉ះទង្គិចគ្នាដ៏មរណៈ រវាងក្រុមអ្នកគាំទ្រ និងអ្នកប្រឆាំងរូបលោក ដែលបានកើតឡើងនៅខែធ្នូឆ្នាំ២០១២។
យោងតាមការផ្សាយព័ត៌មានរបស់ទូរទស្សរដ្ឋដដែល តុលាការក៏នឹងកាត់មនុស្ស១៤នាក់ផ្សេងទៀត ដែលជាអ្នកសិ្នទ្ធនៅក្នុងក្រុមចលនាភាតរៈអ៊ីស្លាមរបស់លោកមូហាមេត ម័រស៊ីផងដែរ។
គួរបញ្ជាក់ផងដែរថា ក្រៅពីបទចោទដែលទាក់ទងនឹងការញុះញង់អោយមានអំពើហិង្សាក្នុងខែធ្នូ ឆ្នាំ២០១២នោះ អតីតប្រធានាធិបតីម័រស៊ីក៏ត្រូវបានតុលាការចេញដីកាឃុំខ្លួនដើម្បីសួ រចម្លើយអំពីបទចោទ មួយទៀត ដែលគេសង្ស័យថាលោកមានទំនាក់ទំនងជាមួយក្រុមប្រយុទ្ធប៉ាឡេស្ទីនដែល បានវាយបំបែកពន្ធនាគារកាលពីឆ្នាំ២០១១។
រដ្ឋាភិបាលបណ្តោះអាសន្នរបស់អេហ្ស៊ីបបច្ចុប្បន្នដែលគាំទ្រដោយក្រុម យោធាបានកំពុងធ្វើទុក្ខបុក ម្នេញ ចលនាភាតរអ៊ីស្លាម របស់លោកមូហាមេត ម័រស៊ី បន្ទាប់ពីព្រឹត្តិការណ៍ទម្លាក់លោកម័រស៊ីពីអំណាច។ រហូតដល់ពេលនេះ មានសមាជិករបស់ក្រុមភាតរៈអ៊ីស្លាមជាង២០០០នាក់ហើយត្រូវបានចាប់ខ្លួន។
គួររម្លឹកថា លោកម័រស៊ីត្រូវបានប្រជាជនស្តីបន្ទោសអំពីអសមត្ថភាពក្នុងការ ដោះស្រាយបញ្ហាវិបត្តិសេដ្ឋកិច្ច ហើយបានតវ៉ាទាមទារអោយលោកចុះចេញពីដំណែងដែលធ្វើអោយអេហ្ស៊ីប ធ្លាក់ក្នុងវិបត្តិសង្គម ហើយក្រុមយោធាក៏បានធ្វើរដ្ឋប្រហារទម្លាក់លោកម័រស៊ីតែម្តង នៅថ្ងៃទី៣កក្កដាកន្លងទៅថ្មីៗនេះ៕ដោយ លាង ដឺលុច (RFI)