ឧបទ្វីបកូរ៉េ៖ព្យុងយ៉ាងបានផ្តល់សញ្ញាធូរស្រាល ដោយសម្រេចដកគ្រាប់មីស៊ីលចេញពីជើងតម្កល់បាញ់
នៅឧបទ្វីបកូរ៉េ បន្ទាប់ពីបានស្គាល់ភាពតានតឹងដល់កំពូលអស់រយៈពេលជាច្រើនសប្តាហ៍ កន្លងមក នៅថ្ងៃអង្គារ ទី៧ ឧសភានេះ កូរ៉េខាងជើងបានសម្រេចដកគ្រាប់មីស៊ីល ២គ្រាប់ចេញពីជើងតម្កល់បាញ់របស់វា។ ចំណែកកម្លំាងទ័ពកូរ៉េខាងជើងក៏លែងស្ថិតក្នុងសភាពប្រុងជើងការដូចមុន ទៀតឡើយ។ ទំាងនេះគឺជាសញ្ញាដែលបញ្ជាក់ពីភាពធូរស្រាលបន្តិចនៅក្នុងឧបទ្វីប កូរ៉េ។ ម្យ៉ាងទៀត កាយវិការរបស់របបក្រុងព្យុងយ៉ាងពេលនេះបានធ្វើឡើង ចំពេលដែលលោកស្រីប្រធានាធិបតីកូរ៉េខាងត្បូង Park Geun-Hye កំពុងបំពេញទស្សនកិច្ចនៅសហរដ្ឋអាមេរិក។ លោកស្រីនឹងជួបសន្ទនាជាមួយលោកប្រធានាធិបតីអាមេរិកអូបាម៉ាដើម្បី និយាយពីបញ្ហាស្ថានភាពនៅក្នុងតំបន់។
គ្រាប់មីស៊ីលទំាងពីរគ្រាប់នោះមានឈ្មោះថា « Musudan » និងដែលកូរ៉េខាងជើងអាចបាញ់ពេលណាក៏បានដែរ តែនៅទីបំផុត រដ្ឋអំណាចក្រុងព្យុងយ៉ាងបែរជាបានសម្រេចដកគ្រាប់មីស៊ីលទំាង ២គ្រាប់នោះចេញពីជើងតម្កល់បាញ់របស់វាទៅវិញ នេះការថ្លែងរបស់អ្នកទទួលខុសត្រូវការពារ ជាតិអាមេរិកំាងម្នាក់ដែលមិន ព្រមបញ្ចេញឈ្មោះ។ យោងតាមអ្នកទទួលខុសត្រូវអាមេរិ កំាងដដែល កាយវិការរបស់កូរ៉េខាងជើងនេះបានបញ្ជាក់យ៉ាងច្បាស់ថា គ្មានទៀតឡើយគ្រោះ ថ្នាក់ភ្លាមៗកើតចេញពីការគំរាមបាញ់គ្រាប់មីស៊ីល របស់កូរ៉េខាងជើង ព្រោះថា ដើម្បីអាចយកគ្រាប់ មីស៊ីលទៅដាក់លើជើងតម្កល់បាញ់របស់វាជាថ្មីនោះ គេត្រូវការពេលយូរដើម្បីរៀបចំ។ ទន្ទឹមគ្នានេះ ព័ត៌មានពីកូរ៉េខាងត្បូងបានអះអាងថា កងទ័ពកូរ៉េខាងជើងក៏លែងស្ថិតក្នុងសភាពប្រុងជើងការដូចមុនទៀតឡើយ។
ក៏ប៉ុន្តែ ទោះបីជាមានកាយវិការបន្ធូរបន្ធយយ៉ាងនេះក្តី ក៏កូរ៉េខាងជើងនៅតែបន្តប្រឆំាងនឹងសមយុទ្ធថ្មីក្នុងសប្តាហ៍នេះរវាង ទ័ពកូរ៉េខាងត្បូង និងសហរដ្ឋអាមេរិកនៅក្រោមសមុទ្រ។ របបក្រុងព្យុងយ៉ាងបានសន្យាថា ខ្លួននឹងធ្វើការវាយបកវិញភ្លាមៗ ប្រសិនបើមានគ្រាប់កំាភ្លើងមួយគ្រាប់ធ្លាក់ក្នុងដែនសមុទ្ររបស់ ខ្លួននោះ។ តាមសេចក្តីជូនដំណឹងមួយចេញផ្សាយដោយទីភ្នាក់ងារផ្លូវការកូរ៉េខាងជើង ឲ្យដឹងថា ទ័ពជើងទឹកកូរ៉េខាងជើងបានទទួលបញ្ជាឲ្យឆ្លើយតបភ្លាមៗ បើមានគ្រាប់កំាភ្លើងធ្លាក់ក្នុងដែនទឹកដែលចែកព្រំដែនសមុទ្ររវាង ប្រទេសទំាងពីរនោះ។
យ៉ាងណាក៏ដោយ កាយវិការកាត់បន្ធយភាពតានតឹងរបស់របបក្រុងព្យុងយ៉ាងពេលនេះបានធ្វើ ឡើង ចំពេលដែលលោកស្រីប្រធានាធិបតីកូរ៉េខាងត្បូង Park Geun-Hye កំពុងបំពេញទស្សនកិច្ចនៅសហរដ្ឋអាមេរិក។ លោកស្រី Park Geun-Hye ដែលបានបញ្ជាក់សារជាថ្មីម្តងទៀតអំពីឆន្ទៈរបស់លោកស្រីក្នុងការ ស្ថាបនាឡើងវិញនូវបរិយាកាសផ្តល់ការទុកចិត្តគ្នាទៅវិញ ទៅមកជាមួយកូរ៉េខាងជើង។ តែជាមួយគ្នានេះ លោកស្រីប្រធានាធិបតីកូរ៉េខាងត្បូងក៏បានសន្យាថា នឹងធ្វើការសងសឹកចាស់ដៃវិញនៅក្នុងករណីណាដែលកូរ៉េខាងជើងហ៊ាន បង្ករឿងតាមផ្លូវយោធានោះ៕ដោយ គួច គន្ធារ៉ា (RFI)