លោកសម រង្ស៊ី គ្មានឈ្មោះក្នុងបញ្ជីបេក្ខជនតំណាងរាស្រ្តរបស់គណបក្សសង្រ្គោះជាតិ
Cambodia News
ភ្នំពេញ៖ ប្រភពពីគណកម្មាធិការជាតិរៀបចំការបោះឆ្នោត (គ.ជ.ប) បានអោយដឹងថា គេបានទទួលយកបញ្ជីឈ្មោះបេក្ខជនតំណាងរាស្ត្ររបស់គណបក្សសង្រ្គោះ ជាតិហើយកាលពីរសៀលថ្ងៃសុក្រនេះ ។ ចំណែកឯតំណាងគណបក្សសង្រ្គោះជាតិបញ្ជាក់ថា ក្នុងបញ្ជីបេក្ខជននោះ មិនមានឈ្មោះលោកសម រង្ស៊ី ប្រធានគណបក្សនេះទេ ។
លោក ហូ វ៉ាន់ អ្នកតំណាងរាស្ត្រនៃគណបក្សសម រង្ស៊ី មណ្ឌលភ្នំពេញ ដែលបានកាន់បញ្ជីបេក្ខជនរបស់គណបក្សសង្រ្គោះជាតិទៅដាក់នៅគ.ជ.ប បានប្រាប់ អ្នកសារព័ត៌មានថា លោកសម រង្ស៊ី មិនត្រូវបានដាក់បញ្ចូលក្នុងបញ្ជីបេក្ខជនទេ ដោយហេតុថា គេមិនអាចធ្វើសេចក្តីបញ្ជាក់ពីឈ្មោះបោះឆ្នោតនៅសាលាសង្កាត់ជូន លោកសម រង្ស៊ី បាន ពោលគឺឈ្មោះលោកសម រង្ស៊ី ត្រូវបានគេលុបចេញពីបញ្ជីឈ្មោះអ្នកបោះឆ្នោតរួចហើយ ។
ទោះជាយ៉ាងនេះក្តី លោកហូ វ៉ាន់ បានប្រាប់អ្នករាយការណ៍ព័ត៌មាននៃកាសែតក្នុងស្រុកថា លោកសម រង្ស៊ី នៅតែជាបេក្ខជននាយករដ្ឋមន្ត្រីនៃគណបក្ស សង្រ្គោះជាតិដដែល ។
យោងតាមមន្រ្តី គ.ជ.ប រហូតមកទល់ពេលនេះ គ.ជ.ប បានទទួលចុះឈ្មោះគណបក្សនយោបាយដែលនឹងត្រូវប្រកួតប្រជែងនៅក្នុង ការបោះឆ្នោតអាណត្តិទី៥នេះ ចំនួន៦គណបក្សហើយ គឺគណបក្សប្រជាជនកម្ពុជា គណបក្សសញ្ជាតិកម្ពុជា គណបក្សហ៊្វុនស៊ិនប៉ិច គណបក្សសាធារណរដ្ឋប្រជាធិបតេយ្យ គណបក្សសម្ព័ន្ធដើម្បីលទ្ធិប្រជាធិបតេយ្យ និងគណបក្សសង្រ្គោះជាតិ ៕