នៅរដូវភ្លៀងទុកដាក់សំរាមឲ្យបានត្រឹមត្រូវ ដើម្បីបញ្ចៀសការស្ទះលូ
Cambodia News
ភ្នំពេញ៖ យោងតាមសេចក្តីជូនដំណឹង ចេញដោយសាលារាជធានីភ្នំពេញ ថ្មីៗនេះ បានជូនដំណឹងដល់ប្រជាពលរដ្ឋត្រូវទុកដាក់សំរាម ឲ្យបានត្រឹមត្រូវ ដើម្បីបញ្ជៀសការស្ទះប្រព័ន្ធលូក្នុងរដូវភ្លៀងធ្លាក់ ដែលកំពុងមកដល់នាពេលខាងមុខនេះ។
ការចេញសេចក្តីជូន ដំណឹងនេះ បន្ទាប់ពីភ្លៀងធ្លាប់ប៉ុន្មានមេនាដើមរដូវវស្សាឆ្នាំនេះ ត្រូវបានគេសង្កេតឃើញថា មានទឹកដក់ជន់នៅតាមដងផ្លូវខ្លះក្នុងរាជធានី។
ទោះជាយ៉ាងណា នៅពេលមានភ្លៀងធ្លាក់ម្តងៗ មន្ទីរសាធារណការ និងដឹកជញ្ជូនរាជធានីភ្នំពេញបានចាត់កម្លាំងរបស់ខ្លួនចុះកកាយ សំរាម ចេញនៅតាមមុខទឹកហូរសំខាន់ៗ នៃបណ្តាញលូ ដើម្បីធ្វើយ៉ាងណាឲ្យទឹកហូរចេញក្រៅក្រុងបានលឿន ហើយបានបញ្ចៀសពីការលិចផ្លូវនៅរាជធានីភ្នំពេញ។
ប៉ុន្តែ ទន្ទឹមនឹងនោះ សាលារាជធានីភ្នំពេញបានអំពាវនាវដល់បងប្អូនប្រជាពលរដ្ឋនៅរាជ ធានីភ្នំពេញទាំងអស់មេត្តាចូលរួមទាំងអស់គ្នាតាមរយៈការមិន បោះចោលសំរាមនៅតាមដងផ្លូវ ឬទុកចោលសំរាមនៅតាមមុខផ្ទះ ដែលធ្វើឲ្យសំរាមរាយប៉ាយហូរចូលទៅប្រព័ន្ធបណ្ដាញលូ ដែលជាមូលហេតុចម្បងធ្វើឲ្យស្ទះលូ និងមានទឹកភ្លៀងលិចផ្លូវ៕