ជិះម៉ូតូជែង រថយន្តកៀរ ដួលបាក់ចង្កេះម្នាក់ របួស ២នាក់
Cambodia News
ភ្នំពេញ៖ កាលពីវេលាម៉ោង៩និង៣០នាទីព្រឹកថ្ងៃទី៦ខែឧសភា បុរសពីរនាក់ រងរបួសស្រាលនិងម្នាក់ទៀត រងរបួសធ្ងន់ ដោយសារតែជិះម៉ូតូលឿន ជ្រែ រថយន្តបែន ដឹកកំពុងតែបត់ឆ្លងផ្លូវ ស្ថិតនៅតាមបណ្តោយ ផ្លូវជាតិលេខ៣ កែងនិងផ្លូវចូលទៅបុរីសន្តិភាព២ ភូមិទួលកី សង្កាត់ភ្លើងឆេះរទះ ខណ្ឌពោធិ៍សែនជ័យ។
ជនរងគ្រោះទាំងបីនាក់ ត្រូវបានគេស្គាល់ថា ទី១មានឈ្មោះ គឿន រដ្ឋា ភេទប្រុសអាយុ២៣ឆ្នាំ មានមុខរបរជាកសិករ ជាអ្នកឌុបរងរបួសស្រាល ទី២មានឈ្មោះ គឿន ភារម្យ ភេទប្រុស អាយុ ៣២ឆ្នាំមាន មុខរបរជាកសិករ រងរបួសត្រង់ចង្កេះធ្ងន់ ជាអ្នកជិះកណ្តាល ទី៣មានឈ្មោះ អ៊ុយ ថុង ភេទប្រុស អាយុ៤៥ឆ្នាំ អ្នកទាំងបីរស់នៅភូមិសូគង ឃុំស្នំក្រពើ ស្រុកគងពិសី ខេត្តកំពង់ស្ពឺ ជិះម៉ូតូ ម៉ាកសេ១២៥ ពណ៌ខ្មៅ ពាក់ស្លាកលេខកណ្តាល 1I-4699 ។ រីឯរថយន្តបង្កវិញ ប្រភេទបែនដឹកដី៥តោន ពុំចាំស្លាកលេខ គេចខ្លួនបាត់ ។
មុនពេលកើតហេតុគេឃើញ ម៉ូតូមួយគ្រឿងជិះគ្នា៣នាក់ ក្នុងល្បឿនលឿនលុះដល់ចំណុចកើតហេតុ ក៏មានរថយន្តមួយគ្រឿង ប្រភេទបែន ដឹកដីចេញមកពីផ្លូវ៣០ម៉ែត្រ បត់ក៏ហើយម៉ូតូប្រឹងជិះជ្រែ ទៅមុនប៉ុន្តែមិនផុតក៏កៀរ ជាមួយរថយន្តដួលបោកទៅនឹងថ្នល់ បណ្តាលឲ្យអ្នកឌុប រងរបួសស្រាល និងអ្នកជិះ កណ្តាល រងរបួសត្រង់ចង្កេះ ទំនងជាបាក់ ចំណែកឯអ្នកជិះពីក្រោយរងរបួសបន្តិចបន្តួចប៉ុណ្ណោះ និងម៉ូតូពុំរងការ ខូចខាតនោះឡើយ ចំណែកឯរថយន្តវិញ បន្ទាប់ពីកើតហេតុបានបន្ថែមល្បឿន គេចខ្លួនបាត់។
ក្រោយកើតហេតុ ជនរងគ្រោះត្រូវបានក្រុមជួយសង្គ្រោះរបស់អង្គភាព៧១១ នៃកងពលតូចលេខ៧០ ជួយដឹកបញ្ជូនទៅកាន់ មន្ទីរពេទ្យព្រះកុសុមះ ហៅពេទ្យ លោកសង្ឃ រីឯម៉ូតូត្រូវបាន នគរបាលយកទៅ រក្សា ទុកនៅប៉ុស្តិ៍នគរបាល ភ្លើងឆេះរទះ ដើម្បីរក្សាទុកជាបណ្តោះអាសន្ន ៕ ហេង នាង
