បុរស ៣នាក់ត្រូវរថយន្ត បុកពេញទំហឹងបណ្ដាលឲ្យរងរបួសធ្ងន់
Cambodia News
ភ្នំពេញ៖ កាលពីវេលាម៉ោង ២២នឹង ១០ នាទីយប់ថ្ងៃទី ០៥ ខែឧសភា បុរស បីនាក់ ជិះម៉ូតូមួយគ្រឿងឌុបគ្នាចេញពីកោះពេជ្រ រងរបួសធ្ងន់ស្រាល នៅចំណុចស្តុបបូកគោ ផ្លូវព្រះមុនីវង្ស កែងផ្លូវម៉ៅសេទុង សង្កាត់បឹងកេងកងទី ១ ខណ្ឌចំការមន ។
យោងតាមប្រភពព័ត៌មាន មុនពេលកើតហេតុគេសង្កេតឃើញបុរសបីនាក់បានជិះម៉ូតូមួយគ្រឿងម៉ាក សង់កូរ៉េ ពណ៌ក្រហមតាមបណ្ដោយផ្លូវម៉ៅសេទុង ក្នុងទិសដៅពីកើតទៅលិច លុះជិះមកដល់ចំណុចកើតហេតុក៏ត្រូវរថយន្តឡិចស៊ីស៤៥០ មួយគ្រឿងមិនស្គាល់ ស្លាកលេខ បានបើកតាមបណ្ដោយផ្លូវព្រះមុនីវង្ស ក្នុងទិសដៅពីត្បូងទៅជើង ក៏ជ្រុលទៅបុកម៉ូតូជនរងគ្រោះពេញទំហឹងតែម្តង បណ្ដាលឲ្យអ្នកជិះម៉ូតូបីនាក់ត្រូវរងរបួសបញ្ជូនទៅសង្គ្រោះនៅ មន្ទីរពេទ្យភ្លាមៗ។
ក្រោយពីកើតហេតុរថយន្តបង្កហេតុបានបើករត់គេចខ្លួនទាំងអូសម៉ូតូ របស់ជនរងគ្រោះទៅតាមរថយន្តរហូតទៅចំណុចផ្លូវលេខ ៦៣ កែងផ្លូវលេខ ៣០៦ សង្កាត់បឹងកេងកងទី ១ ខណ្ឌចំការមន ទើបម៉ូតូជនរងគ្រោះខ្ទាតចេញពីរថយន្តបង្កេងហេតុ ហើយរថយន្តបង្កបានបន្ថែមល្បឿនរត់គេចខ្លួនបាត់៕ ហេង នាង
