កិច្ចប្រជុំអាស៊ាន អឺរ៉ុប លើកទី២ ស្ដីពីជំនួញ និងពាណិជ្ជកម្ម
នៅថ្ងៃទី ១ មេសា ២០១២ ប្រទេសកម្ពុជា បានបើកកិច្ចប្រជុំធំមួយ គឺអាស៊ាន-អឺរ៉ុប លើកទី២ ស្ដីពីជំនួញ និងពាណិជ្ជកម្ម ក្រោមប្រធានបទថា «ឈានទៅមុខទាំងអស់គ្នាន»។ នៅក្នុងកិច្ចប្រជុំមានអ្នកវិនិយោគទុនជាតិ និងអន្តរជាតិ មកពីតំបន់អឺរ៉ុបចូលរួមចំនួនជាង ២០០នាក់។
លោកនាយករដ្ឋមន្ត្រី ហ៊ុន សែន បានប្រកាសថា អាស៊ាន នៅតែចាត់ទុកប្រទេសនៅតំបន់អឺរ៉ុប ជាដៃគូសេដ្ឋកិច្ច និងពាណិជ្ជកម្មដ៏សំខាន់ និងធំជាងគេ បន្ទាប់ពីប្រទេសចិន សម្រាប់ការផ្លាស់ប្ដូរពាណិជ្ជកម្មសេរី នៅគ្រាដែលមេដឹកនាំប្រទេសសមាជិកអាស៊ាន ចំនួន ១០ គ្រោងបង្កើតសហគមន៍អាស៊ាននៅឆ្នាំ ២០១៥។
ជាមួយគ្នានេះដែរ លោក ហ៊ុន សែន បានអំពាវនាវឲ្យអ្នកជំនួញនៅតំបន់អឺរ៉ុប មកវិនិយោគទុននៅប្រទេសកម្ពុជា ក្នុងការនាំអង្ករចេញទៅទីផ្សារអន្តរជាតិ ពីព្រោះកម្ពុជាមានសក្ដានុពលខាងវិស័យកសិកម្ម។
លោក សុរិន្ទ ពិតសុវណ្ណ អគ្គលេខាធិការអាស៊ាន បានមានប្រសាសន៍ថា នៅឆ្នាំ ២០១០ កន្លងទៅនេះ តំបន់អឺរ៉ុប គឺជាទីផ្សារសម្រាប់ការនាំចូលទំនិញពាណិជ្ជកម្មដ៏ធំ សម្រាប់តំបន់អាស៊ាន ចំនួន ១០,៧ភាគរយ ហើយទំហំពាណិជ្ជកម្មនេះ គឺស្ថិតនៅដដែល នៅឆ្នាំ ២០១១។
តំណាងសហភាពអឺរ៉ុប លោក ដូមីនីក ខាតទ្រី ( Dominique Catry ) មានប្រសាសន៍ថា តំបន់អឺរ៉ុប នៅតែជាដៃគូសំខាន់ និងខ្លាំងរបស់អាស៊ាន សម្រាប់ការធ្វើពាណិជ្ជកម្ម និងវិនិយោគទុន។ ទោះជាយ៉ាងណាក៏ដោយ សហភាពអឺរ៉ុប បានធ្វើឲ្យល្អប្រសើរឡើងនូវស្ថានការណ៍សេដ្ឋកិច្ច និងហិរញ្ញវត្ថុកន្លងមក។ យើងបានឈានទៅមុខ ជាមួយនឹងផែនការយុទ្ធសាស្ត្រចាំបាច់នានា ដើម្បីឲ្យមានកំណើនសេដ្ឋកិច្ច៕
