ជិះម៉ូតូឌុបសង្សារឆក់ទូរស័ព្ទដៃមិនបានសម្រេចត្រូវសម្ថកិច្ចចាប់ខ្លួន
Cambodia News
ភ្នំពេញ៖ កាលពីវេលាម៉ោង ៩និង៤០នាទីព្រឹក ថ្ងៃទី០៣ ខែឧសភា យុវជនម្នាក់ត្រូវបានសមត្ថកិច្ច ឃាត់ខ្លួនភ្លាមៗ និងនារីម្នាក់បានរត់គេចខ្លួនបាត់ ក្នុងខណៈពេលដែលពួកគេ ធ្វើសកម្មភាពឆក់ទូរស័ព្ទដៃពីជនជាតិចិននៅតាមបណ្ដោយផ្លូវលេខ៣១០ កែងនឹងផ្លូវលេខ១៤៣ ស្ថិតក្នុងសង្កាត់បឹងកេងកងទី៣ ខណ្ឌចំការមន ។
យុវជន ដែលជាជនសង្ស័យត្រូវឃាត់ខ្លួនខាងលើនេះ មានឈ្មោះ ដារ៉ា សុធី អាយុ២១ឆ្នាំ ស្នាក់នៅភូមិទួលរកា សង្កាត់ចាក់អង្រែក្រោម ខណ្ឌមានជ័យ។ ចំណែកឯនារីដែលជាគូរសង្សារម្នាក់ទៀតនោះបានរត់គេចខ្លួនបាត់ ក្រោយពេលកើតហេតុ។
សមត្ថកិច្ចបានបញ្ជាក់ថា មុនពេលកើតហេតុ គឺជនជាតិចិនបានចូលទិញឥវ៉ាន់នៅចំណុចកើតហេតុខាងលើ ខណៈនោះស្រាប់តែយុវជនខាងលើ ជិះម៉ូតូមួយគ្រឿងម៉ាក ហ្វីនណូ ពណ៌ស ពាក់ស្លាកលេខភ្នំពេញ 1AB-7757 បើកបរតាមបណ្ដោយផ្លូវលេខ៣១០ ក្នុងទិសដៅពីលិចមកកើត ឌុបសង្សារ មកធ្វើសកម្មភាពឆក់ទូរស័ព្ទដៃពីជនជាតិចិន ដែលកំពុងឈរនិយាយទូរស័ព្ទ បានសម្រេច ហើយព្យាយាមរត់ជិះម៉ូតូរត់គេចខ្លួន ប៉ុន្តែជាអកុសល ជនសង្ស័យបានដួលម៉ូតូ ហើយត្រូវសមត្ថកិច្ចនិងប្រជាពលរដ្ឋជួញដេញចាប់បានជនសង្ស័យ ឈ្មោះដារ៉ា សុធី ប៉ុន្តែនារីម្នាក់ទៀតដែលជាគូរសង្សារបានរត់គេចខ្លួនបាត់ភ្លាមៗ ។
ក្រោយពេលកើតហេតុ ជនសង្ស័យត្រូវសមត្ថកិច្ចនគរបាលប៉ុស្តិ៍បឹងកេងកងទី៣ នាំខ្លួនមកធ្វើការសាកសួរ នៅទីស្នាក់ការប៉ុស្តិ៍បឹងកេងកង និងកសាងសំណុំរឿងបញ្ចូនខ្លួនទៅកាន់អធិការដ្ឋាននគរបាលខណ្ឌចំការមន រងចាំកសាងសំណុំរឿងបញ្ជូនបន្តទៅសាលាដំបូងរាជធានីភ្នំពេញ ដើម្បីផ្ដន្ទាទោសតាមនីតិវិធីច្បាប់៕ ហេង នាង
