ចតចោលនិងគេចខ្លួន ក្រោយពីបុកហើយ
Cambodia News
ភ្នំពេញ៖ កាលពីវេលាម៉ោង២២នឹង០០នាទីយប់ ថ្ងៃទី២៩ ខែមេសា រថយន្តមួយគ្រឿងម៉ាក ឡិចស៊ីស RX300 ពណ៌ស ពាក់ស្លាកលេខ ភ្នំពេញ 2U-8678 ត្រូវអ្នកបើកបរបើកបុក ជាមួយអ្នកជិះម៉ូតូម៉ាកវីវ៉ា ពណ៌ខ្មៅ នៅចំណុចផ្លូវលេខ១៧៣ កែង៣៤៨ សង្កាត់ទួលស្វាយព្រៃទី១ ខណ្ឌចំការមន។
តាមប្រភពព័ត៌មានពីកន្លែងកើតហេតុខាងលើ បានឲ្យដឹងថា មុនពេលកើតហេតុ រថយន្តឡិចស៊ីស បើកបរតាមបណ្តោយផ្លូវ១៧៣ ក្នុងទិសដៅពីជើងទៅត្បូង លុះដល់ចំណុចផ្លូវកែងលេខ៣៤៨ ក៏បុកគ្នាជាមួយម៉ូតូវីវ៉ា ដែលបើកបរតាមបណ្តោយផ្លូវលេខ៣៤៨ ក្នុងទិសដៅពីលិចទៅកើត បណ្តាលឲ្យដួលម៉ូតូរងរបួសអ្នកជិះម៉ូតូម្នាក់។ ដោយឡែករថយន្តក្រោយពេលកើតហេតុ ត្រូវម្ចាស់ចតទុកចោល ហើយបើកទ្វាររថយន្តចុះរត់គេចខ្លួនបាត់។
ចំពោះករណីខាងលើនេះ ប៉ូលិសមូលដ្ឋានបានចុះអន្តាគមន៍វាស់វែងដកហូតរថយន្តនិងម៉ូតូ ខាងលើ យកទៅរក្សាទុកនៅអធិការដ្ឋាននគរបាលខណ្ឌ ដើម្បីចាត់ការតាមច្បាប់។ សមត្ថកិច្ចសន្និដ្ឋានថា ករណីនេះ កើតឡើងដោយសារអ្នកបើកបររថយន្ត និងអ្នកបើកបរម៉ូតូបើកគ្មានការប្រុងប្រយ័ត្នដូចគ្នានៅចំណុចផ្លូវកែង ទើបបង្កឲ្យមានគ្រោះថ្នាក់កើតឡើង៕ ហេង នាង
