ស៊ុំ សុម៉ាលី ឪពុកម្តាយបង្ខំឲ្យដើរចេញពីសិល្បះ
Cambodia News
ព័ត៌មានកម្សាន្ត
ភ្នំពេញ៖ ទើបតែបោះជំហានក្នុងវិថីសិល្បះមិនទាន់បានប៉ុន្មានឆ្នាំផងនោះ តារាសម្តែងស្រស់ក្មេង សាច់សខ្ចី នាង ស៊ុំ សុម៉ាលី ត្រូវបានគេមើលឃើញថា ប្រជាប្រិយភាពរបស់នាងនៅក្នុងអាជីពមួយនេះហាក់មានការគាំទ្រគួសមពីសំណាក់ទស្សនិកជន ខណះពេលដែលនាងបានបង្ហញវត្តមានសម្តែងនៅក្នុងរឿង កូនឥតខាន់ស្លា ដែលកំពុងតែចាក់ផ្សាយនៅស្ថានីយទូរទស្សន៍CTN នោះ។
ទេពកោសល្យនៃការសម្តែង និងរូបសម្រស់ក្មេងខ្ចីរបស់តារាសម្តែងរូបនេះត្រូវបានគេរំពឹងថា នាងអាចនឹងឈានចាប់ឈោងនូវការគាំទ្រកាន់តែខ្លាំងបន្ថែមទៀត ដោយមិនចាញ់តារាជើងចាស់ឡើយ នៅក្នុងពេលដែលនាងកំពុងតែបោះជំហានយ៉ាងរលូននៅក្នុងអាជីពសិល្បះនេះ។
ប៉ុន្តែបើទោះបីជាគេមើលឃើញថា អានាគតក្នុងសង្វៀនសិល្បះរបស់តារាសម្តែងរូបនេះអាចនឹងមានភាពស្រស់បំព្រងយ៉ាងណាក៍ដោយ តែបើពិនិត្យមើលពីបញ្ហាផ្ទៃក្នុងរង្វង់គ្រួសាររបស់នាងវិញនោះគឺមានភាពផ្ទុយស្រឡះពីនេះ ពោលស៊ុំ សុម៉ាលី តែងតែត្រូវបានឪពុកម្តាយរបស់នាងបង្ខំឲ្យដើរចេញពីផ្លូវសិល្បះនេះទៅវិញ។
គំនៀបពីគ្រួសារផ្ទុយពីគំនិតផ្ទាល់ខ្លួននេះត្រូវបាន ស៊ុំ សុម៉ាលី អះអាងប្រាប់ថា ការបង្ខំឲ្យដើរចេញពីសិល្បះពីសំណាក់ឪពុកម្តាយរបស់នាងគឺកើតមានជាយូរមកហើយ តែដោយសារចិត្តមានះ និងការស្រឡាញ់នោះទើបនាងនៅតែពុះពារដើរនៅលើផ្លូវសិល្បះនេះដដែល។ គំនិតឲ្យដើរចេញពីសិល្បះនេះកើតចេញពីឪពុកម្តាយរបស់នាងផ្ទាល់ ដោយសារតែពួកគាត់យល់ថា ការងារសិល្បះរបស់នាងក្នុងរយះពេលប៉ុន្មានឆ្នាំនេះ ហាក់មិនមានអ្វីសេសសល់ជាដុំកំពួនឡើយ ទើបឪពុកម្តាយរបស់នាងចង់ឲ្យនាងប្តូរការងារថ្មីក្រៅអំពីការងារសិល្បះ។ ត្រង់ចំណុចនេះតារាសម្តែងរាងតូចច្រឡឹងមុខមានមន្តស្នេហ៍រូបនេះបានបញ្ជាក់ថា មូលហេតុដែលធ្វើឲ្យនាងមានមិនមានលេចធ្លោក្នុងសង្គមសិល្បះនោះ ដោយសារតែនាងទើបតែប្រឡូកក្នុងវិស័យសិល្បះ ហើយម្យ៉ាងនាងតែងតែរកប្រាក់ពីអាជីពមួយនេះដោយកំលាំងញើសឈាមរបស់នាងផ្ទាល់ ដោយមិនទទួលយកទ្រព្យសម្បត្តិពីបុរសមានទ្រព្យណាម្នាក់ដើម្បីបង្កើនភាពហ៊ឺហាឡើយ។
ទោះជាយ៉ាងណានាងគិតថា ការងារសិល្បះគឺមិនអាចមានឋិតថេរយូរអង្វែងបានឡើយ ហេតុនេះនាងអាចនឹងសម្រេចចិត្តយល់ស្របតាមគំនិតរបស់ឪពុកម្តាយរបស់នាង ខណះពេលដែលការងារក្រៅរង្វង់សិល្បះហាក់មានតំរុយខ្លះហើយនោះ។
ស៊ុំ សុម៉ាលី បញ្ជាក់ថា ការងារថ្មីនេះនាងអាចនឹងចូលធ្វើនៅក្នុងអំឡុងពេលមួយខែទៅពីរខែទៀតហេតុនេះការងារសិល្បះរបស់នាងអាចនឹងមានការរយាជាងមុនបន្តិច។ ការរយាក្នុងសិល្បះនេះមិនមែនមានន័យថា នាងបោះបង់ចោលទាំងស្រុងនោះឡើយ ពោលគឺនាងនៅតែបន្តអាជីពនេះដដែល គ្រាន់តែនាងសម្រេចចិត្តផ្អាកថតខ្សែភាពយន្ត ចំណែកការថតផ្សាយពាណិជកម្ម និងឈុតខារ៉ាអូខេគឺនាងនៅតែទទួលដដែល។
តារារូបនេះនិយាយថា ការថតខ្សែភាពយន្តគឺត្រូវប្រើរយះពេលវែងហេតុនេះនាងមិនអាចដកឃ្លាបានឡើយ តែបើត្រឹមតែថតផ្សាយពាណិជកម្ម និងខារ៉ាអូខេរយះពេលមួយថ្ងៃឬពីរថ្ងៃនោះគឺមិនមានបញ្ហាសម្រាប់រូបនាងឡើយ។
យ៉ាងណាក៍ដោយនាងមិនចង់បោះបង់អាជីពសិល្បះត្រឹមពាក់កណ្តាលទីនេះឡើយ ព្រោះការងារនេះបានធ្វើឲ្យនាងមានមុខមានមាត់រហូតមកដល់ពេល តែដោយសារតែគំនៀបពីឪពុកម្តាយ ហើយម្យ៉ាងប្រសិនបើនាងមានស្វាមី ហើយត្រូវស្វាមីបង្ខំឲ្យឈប់ពីសិល្បះដែរនោះគឺជារឿងមួយមិនអាចជៀសផុតបានឡើយ។
ទាក់ទងបញ្ហាអនាគតនេះ ស៊ុំ សុម៉ាលី ក៍បានបង្ហើបឲ្យដឹងដែរថា សព្វថ្ងៃនាងកំពុងតែបន្តការមើលចិត្តថ្លើមបុរសជាអ្នករកស៊ីនៅក្នុងស្រុកម្នាក់ដែលត្រូវបាននែនាំដោយបងស្រីរបស់នាងអស់រយះពេលជាងមួយឆ្នាំមកហើយ។តាមការអង្កេតរបស់នាងជាងមួយឆ្នាំមកនេះគឺបុរសរូបនេះមានការចាប់អារម្មណ៍ និងយកចិត្តទុកដាក់ចំពោះនាងយ៉ាងខ្លាំង តែនាងនៅមិនទាន់ប្រាកដនៅឡើយទេ ដោយសារតែទាំងសងខាងនៅមិនទាន់ច្បាស់លាស់នៅឡើយចំពោះរឿងនេះ៕ ស.រ
