ស្រវឹងបើករថយន្តទៅបុកបុរស ២នាក់រងរបួសធ្ងន់ខណៈកំពុងជិះម៉ូតូ
Cambodia News
ភ្នំពេញ៖ កាលពីម៉ោង១និង១០នាទីរំលងអធ្រាត្រ ឈានចូលថ្ងៃទី២១ ខែមេសា បុរសជនជាតិកូរ៉េ ២នាក់ស្រវឹង ជិះរថយន្តទៅបុកបុរស ២ នាក់ ខណៈកំពុងជិះម៉ូតូស្របទិសគ្នា ត្រង់ម្តុំរង្វង់មូលវិមានឯករាជ្យ ស្ថិតនៅត្រង់មហាវិថីព្រះសុរាម្រិត ប្រសព្វនិងមហាវិថីព្រះនរោត្តម ក្នុងសង្កាត់ចតុមុខ ខណ្ឌដូនពេញ បណ្តាលឲ្យបុរសម្ចាស់ម៉ូតូទាំង២នាក់ រងរបួសធ្ងន់។
ប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុ គេឃើញបុរស២នាក់ជិះម៉ូតូម៉ាកICON ពណ៌ស តាមបណ្តោយផ្លូវសហព័ន្ធរុស្សី ក្នុងទិសដៅពីលិចទៅកើត លុះទៅដល់ចំណុចកើតហេតុ ត្រង់រង្វង់មូលវិមានឯករាជ្យ ស្រាប់តែមានបុរសជនជាតិកូរ៉េ២នាក់ បើករថយន្តកាមរីឆ្លាមពណ៌ស មកបុកពីក្រោយ បណ្តាលឲ្យអ្នកជិះម៉ូតូICON ដួលបាក់ជើងទាំង២នាក់ ចំណែកជនជាតិកូរ៉េ បើករថយន្តរត់គេចបាត់។
ក្រោយកើតហេតុជនរងគ្រោះត្រូវរថយន្តសង្គ្រោះបន្ទាន់ ដឹកយកទៅព្យាបាលនៅគ្លីនិក គីមសុង ចំណែកម៉ូតូត្រូវក្រុមគ្រួសារយកទៅរក្សាទុក៕ ហេង នាង
