យុវជនពីរនាក់រងរបួសធ្ងន់ខណៈកំពុងជិះម៉ូតូត្រូវរថយន្តបុក
Cambodia News
ភ្នំពេញ៖ កាលពីវេលាម៉ោង២១ និង៣០នាទីយប់ ថ្ងៃទី១១ ខែមេសា យុវជនពីរនាក់ ជិះម៉ូតូ មួយគ្រឿង តាមបណ្តោយផ្លូវមុនីរ៉េត ក្នុងសង្កាត់ទួលស្វាយព្រៃទី២ ខណ្ឌចំការមន ក្នុងទិសដៅពីលិចទៅកើត ត្រូវរថយន្តមិនស្គាល់ម៉ាកមួយគ្រឿងដែលកំពុងបើកបរបញ្ច្រាសទិសគ្នា បានបើកបុកពេញទំហឹង បណ្តាលឲ្យយុវជនជាម្ចាស់ម៉ូតូទាំងពីរនាក់រងរបួស សន្លប់ស្តូកស្តឹងនៅនឹងកន្លែងកើតហេតុ
យុវជនរងគ្រោះពីរនាក់ខាងលើ ជិះម៉ូតូម៉ាកសេ១២៥ ពណ៌ខ្មៅ ត្រូវរងការខូចខាតទាំងស្រុង ចំណែកឯរថយន្តបានបើករត់គេចខ្លួនបាត់ភ្លាមៗ ក្រោយពេលដឹងថា បុកម៉ូតូឲ្យមនុស្សរងរបួស។
ក្រោយពីកើតហេតុនោះ ម៉ូតូត្រូវបានសមត្ថកិច្ចទំនាក់ទំនងទៅក្រុមគ្រួសារយុវជនទាំងពីរនាក់ ឲ្យមកទទួលយកទៅវិញ ចំណែកឯយុវជនដែលរងរបួស ត្រូវរថយន្តសាមុយដឹកយកទៅសង្គ្រោះនៅមន្ទីរពេទ្យភ្លាមៗ៕ ហេង នាង
