បក្សប្រឆាំង ព្រមានធ្វើបាតុកម្មបើ គ.ជ.ប មិនកែប្រែជំហរ
Cambodia News
ភ្នំពេញ៖ កាលពីរសៀលថ្ងៃទី១០ ខែមេសា ឆ្នាំ២០១៣ ជាតិ លោក យឹម សុវណ្ណ អ្នកនាំពាក្យគណបក្សសង្គ្រោះ បានថ្លែងដោយព្រមានថា បើសិនជា គ.ជ.ប មិនកែប្រែជំហរ មិនធ្វើបញ្ជីឈ្មោះបោះឆ្នោតឡើងវិញទេ ហើយនិងមិនធ្វើការផ្លាស់ប្តូរសមាសភាពមួយចំនួន ពិសេស គ.ជ.ប នៅថ្នាក់ក្រោម ហើយនៅតែធ្វើការដោយគ្មានតម្លាភាព និងការទទួលខុសត្រូវទេ នោះគណបក្សសង្គ្រោះជាតិ នឹងធ្វើបាតុកម្ម នៅថ្ងៃទី២៤ ខែមេសា ខាងមុខនេះ។
លោក យឹម សុវណ្ណ បានបញ្ជាក់ថា ការធ្វើបាតុកម្ម នៅថ្ងៃទី២៤ ខែមេសាខាងមុខនេះ គឺជាដំណាក់កាលទី១ ដែលមានអ្នកចូលរួមយ៉ាងតិច ៤.០០០ នាក់ ដោយនឹងប្រមូលផ្តុំគ្នានៅទីលានប្រជាធិបតេយ្យ ហើយធ្វើសេចក្តីថ្លែងការណ៍នៅទីនោះ ប្រហែលជា ៣០ នាទី រួចដើរចេញដំណើរទៅទីស្នាក់ការកណ្តាលរបស់គណៈកម្មាធិការជាតិរៀបចំ ការបោះឆ្នោត គ.ជ.ប. នៅក្នុងក្រសួងមហាផ្ទៃ។
អ្នកនាំពាក្យរូបនោះ បានអះអាងថា «គម្រោងធ្វើបាតុកម្ម របស់គណបក្សប្រឆាំងនេះ គឺដើម្បីឲ្យគណៈកម្មាធិការជាតិរៀបចំការបោះឆ្នោត ធ្វើតាមអនុសាសន៍របស់អង្គការសហប្រជាជាតិ មិនអាចទទួលយកបានការបោះឆ្នោតឡប់ឡែ ដែលមេដឹកនាំឡើងកាន់អំណាច ដោយការលួចបន្លំសន្លឹកឆ្នោត»។
ទាក់ទងនឹងការព្រមានធ្វើបាតុកម្មនេះ លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត គ.ជ.ប. បានថ្លែងថា គ.ជ.ប គ្រាន់តែធ្វើទៅតាមច្បាប់ប៉ុណ្ណោះ ហើយ គ.ជ.ប មិនអាចកែប្រែអ្វីតាមការទាមទាររបស់គណបក្សប្រឆាំង ឬសង្គមស៊ីវិល ដែលផ្ទុយនឹងច្បាប់បានទេ៕
