រុស្ស៊ីនិងហូឡង់គ្រោងបន្លាយបំពង់ឧស្ម័នចេញពីអាល្លឺម៉ង់ លុះទៅដល់អង់គ្លេស
គម្រោងនេះ មានចែងក្នុងកិច្ចព្រមព្រៀង ទើបចុះ រវាងក្រុមហ៊ុនយក្សរុស្ស៊ីខាងឧស្ម័ន Gazprom និងដៃគូហូឡង់ខាងសាងសង់បំពង់ឧស្ម័ន Gasunie ដើម្បីធ្វើការសិក្សារួមគ្នាឆ្ពោះទៅបន្លាយខ្សែបំពង់បង្ហូរឧស្ម័ន រុស្ស៊ីឈ្មោះ Nord Stream ចេញពីឆ្នេរប្រទេសអាល្លឺម៉ង់ លុះទៅដល់ប្រទេសអង់គ្លេសតែម្តង។
ជាការរំលឹក ខ្សែបំពង់បង្ហូរឧស្ម័នរុស្ស៊ីឈ្មោះ Nord Stream មានប្រវែង១.២២០គ.ម. ត្រូវបានសង់ឡើងចេញពីប៉ែកឧត្តរប្រទេសរុស្ស៊ី ហើយលូនតាមបាតសមុទ្របាល់ទិក ទៅដល់ឆ្នេរប្រទេសអាល្លឺម៉ង់ កាលពីខែវិច្ឆិកាឆ្នាំ២០១១។ វាមានសមត្ថភាពបង្ហូរឧស្ម័នបរិមាណបាន ២៧.៥០០លានម៣ក្នុង១ឆ្នាំ។ លុះនៅខែតុលា ឆ្នាំ២០១២ មានសង់បានខ្សែទី២នៃបំ ពង់នេះ ដែលមានប្រវែងដូចគ្នា និងសមត្ថភាពបង្ហូរប៉ុណ្ណឹងដែរ ទាល់តែបង្កើនទ្វេដងបរិមាណឧស្ម័នរុស្ស៊ីដែលបង្ហូរទៅ រហូតដល់៥៥.០០០លាន ម៣ក្នុង១ឆ្នាំ។
ជាការកត់សម្គាល់ បច្ចុប្បន្នរុស្ស៊ីផ្គត់ផ្គង់បានដល់ទៅ៤០%នៃតម្រូវការប្រទេស អាល្លឺម៉ង់ ខាងឧស្ម័ន- តួលេខនេះត្រូវបានលើកឡើងដោយលោកប្រធានាធិបតីរុស្ស៊ីពូទីន ដែលម្សិលមិញបានបញ្ចប់ទស្សនកិច្ចការងារនៅប្រទេសអាល្លឺម៉ង់។
មូលហេតុដែលបានញ៉ាំងរុស្ស៊ីឲ្យសង់ជាខ្សែបំពង់ Nord Stream លូនតាមបាត សមុទ្របាល់ទិក នោះគឺដើម្បីបញ្ចៀសឲ្យផុតពីភាពរអាក់រអួលដែលឧស្សាហ៏ កើតមានឡើង មកពីឧស្ម័នរុស្ស៊ី ក្នុងបរិមាណដល់ទៅ៨០%ឯណោះដែលរុស្ស៊ីលក់ទៅឲ្យបណ្តាប្រទេសសហភាព អឺរ៉ុប គឺត្រូវបង្ហូរកាត់តាមដែនដីអ៊ុយក្រែន។ ២០%ទៀត គឺកាត់តាមដែនដីបេឡារុសជាសម្ព័ន្ធមិត្តទេតើ។
តាមដែលប្រធាននៃក្រុមប្រឹក្សាភិបាលក្រុមហ៊ុនយក្សរុស្ស៊ី Gazprom លោក Alexei Miller ថ្លែង បន្ទាប់ពីពិធីចុះហត្ថលេខានោះ ៖ ខ្សែបំពង់ Nord Stream ដែលនឹងបន្លាយចេញពីឆ្នេរអាល្លឺម៉ង់ទៅកាន់ប្រទេសអង់គ្លេស ដោយសហការជាមួយក្រុមហ៊ុនហូឡង់ Gasunie គឺមានន័យថា ឧស្ម័នរុស្ស៊ីនឹងទទួលលទ្ធភាពលុកចូលទៅក្នុងទីផ្សារថ្មីៗ រួចជាបឋមគឺទីផ្សារអង់គ្លេស។
ទន្ទឹមនិងខ្សែបំពង់ Nord Stream លូនចេញពីទឹកដីខាងជើងរបស់ខ្លួន រុស្ស៊ីកាលពី៤ខែមុន បានចាប់ផ្តើមសង់ខ្សែបំពង់បង្ហូរឧស្ម័នដែលលូនចេញពីប៉ែកខាងត្បូង គឺលូនតាមបាតសមុទ្រខ្មៅទៅកាន់បណ្តាប្រទេសនៃអឺរ៉ុបខាងត្បូង ដោយមុនដំបូងទៅដល់ Bulgarie បន្ទាប់មក មួយខ្សែបែកទៅលើ ទៅកាន់ Serbie Hongrie Slovenie Autriche ហើយមួយខ្សែទៀត បែកទៅក្រោម ទៅកាន់ប្រទេសក្រិកនិងអ៊ីតាលី។ វានឹងសង់រួចក្នុងឆ្នាំ២០១៥ ប្រកបដោយសមត្ថភាពបង្ហូរឧស្ម័ន គឺរហូតដល់ ៦៣.០០០លាន ម៣ក្នុង១ឆ្នាំ។
រុស្ស៊ីលក់ឧស្ម័នធម្មជាតិ ក្នុង១ឆ្នាំៗ ទៅកាន់បណ្តាប្រទេសសហភាពអឺរ៉ុប គឺប្រមាណ១៥០.០០០លានម៣ក្នុងតម្លៃមធ្យម គឺ៣៨០ដុល្លារស.រ.អា.ក្នុង១០០០ ម៣៕ដោយ កែវ ឆាយា(RFI)
