ស្ត្រីម្នាក់ និងកុមារាម្នាក់ត្រូវជនមិនស្គាល់មុនមួយក្រុមបាញ់ស្លាប់
Cambodia News
ភ្នំពេញ៖ កាលពីវេលាម៉ោង១៧និង២០នាទីយប់ ថ្ងៃទី០៨ ខែមេសា ស្ត្រីម្នាក់ និងកុមារាម្នាក់បានស្លាប់បាត់បង់ជីវិត ក្នុងអំពើបាញ់ប្រហារចំនួន៥ពីសំណាក់ខ្មាំងកាំភ្លើងមួយក្រុម នៅក្នុងប្លុងបុរីញ៉ូថោន (New town ) ស្ថិតក្នុងភូមិព្រែកទា សង្កាត់ចោមចៅ ខណ្ឌពោធិ៍សែនជ័យ។
អ្នកស្លាប់ក្នុងអំពើបាញ់ប្រហារខាងលើនេះ ម្នាក់ឈ្មោះ ទិត្យ ធារ៉ា អាយុ២៦ឆ្នាំ និងក្មួយប្រុសម្នាក់ទៀតមិនទាន់ស្គាល់អត្តសញ្ញាណនោះទេ ដោយសារកុមាររងគ្រោះបានស្លាប់នៅមន្ទីរពេទ្យកុមារជាតិ បន្ទាប់ពីបញ្ជូនទៅសង្គ្រោះបន្ទាន់ ក្រោយពេលដែលរងរបួសដោយគ្រាប់កាំភ្លើង។ហើយស្ត្រីម្នាក់ទៀតដែលរងរបួសធ្ងន់ កំពុងត្រូវសង្គ្រោះនៅមន្ទីរពេទ្យដែរ មានឈ្មោះ សន សុម៉ាឡែន អាយុ៣២ឆ្នាំ។
មុនពេលកើតហេតុ ស្ត្រីឈ្មោះ ទិត្យ ធារ៉ា បានត្រឡប់មកពីធ្វើការនៅធនាគារកាណាឌីយ៉ា សាខាកំបូល ដោយរថយន្តក្រុមហ៊ុនជូនមកផ្ទះនៅកន្លែងកើតហេតុខាងលើ លុះមកដល់មុខផ្ទះស្ត្រីឈ្មោះទិត្យ ធារ៉ា ក៏បានចុះពីរថយន្តបំណងដើរចូលផ្ទះ ក៏មានជនប្រដាប់អាវុធម្នាក់ស្លៀកពាក់ស៊ីវិល ដើរសំដៅមកបាញ់រះលើឈ្មោះ ទិត្យ ធារ៉ា បណ្ដាលឲ្យគ្រាប់កាំភ្លើងត្រូវដងខ្លួនស្លាប់ភ្លាមៗនៅកន្លែងកើតហេតុ ។
គ្នាជាមួយស្ត្រីឈ្មោះទិត្យ ធារ៉ាក៏ត្រូវរងរបួសទាំងម្តាយនិងកូនដោយគ្រាប់កាំភ្លើងជន ប្រដាប់អាវុធបាញ់ បណ្តាលឲ្យស្លាប់កូនប្រុសម្នាក់ពេលបញ្ជូនទៅដល់មន្ទីរពេទ្យ និងស្ត្រីឈ្មោះសន សុម៉ាឡែនរងរបួសធ្ងន់។
ករណីខាងលើនេះ សមត្ថកិច្ចជំនាញមិនទាន់សន្និដ្ឋានថា ការបាញ់សម្លាប់នេះបណ្តាលមកពីមូលហេតុអ្វីនៅឡើយទេ ប៉ុន្តែប្រភពក្រៅផ្លូវការបាននិយាយថាបណ្តាលមកពីរឿងគំនុំច្រើនជាង៕ ហេង នាង
