អ្នករុញរទេះលក់ចាហួយ ម្នាក់ត្រូវម៉ូតូបុកបណ្តាលឲ្យរងរបួសធ្ងន់
Cambodia News
ភ្នំពេញ៖ កាលពីវេលាម៉ោង៤និង៥០នាទីរសៀល ថ្ងៃទី២ ខែមេសា យុវជនជាអ្នករុញរទេះលក់ចាហួយ ម្នាក់រងរបួសដួលសន្លប់ស្តូកស្តឹងម្នាក់ឯង ត្រូវសមត្ថកិច្ចបញ្ជូនទៅសង្គ្រោះនៅមន្ទីរពេទ្យមិត្តភាពខ្មែរសូវៀត បន្ទាប់ពីត្រូវម៉ូតូមួយគ្រឿងដឹកត្រីចំហុយបុកពេញទំហឹងចំពីក្រោយ នៅចំណុចមុខផ្ទះលេខ476 តាមបណ្តោយផ្លូវលេខ271 សង្កាត់ទំនប់ទឹក ខណ្ឌចំការមន។
មុនពេលកើតហេតុ យុវជនម្នាក់អាយុប្រហែល១៧ឆ្នាំ បានរុញរទេះលក់បង្អែម ចាហួយតាមដងផ្លូវលេខ271 ពីជើងទៅត្បូង លុះដល់ពេលយុវជនរូបនោះរុញមកដល់កន្លែងកើតហេតុក៏ស្រាប់តែម៉ូតូ មួយគ្រឿងបុកពីក្រោយពេញទំហឹង បណ្តាលឲ្យយុវជនដែលរុញរទេះលក់បង្អែមចាហ៊ួយសន្លប់ស្តូកស្តឹង តែម្តងឯង។
ជនបង្ករដែលជិះម៉ូតូបុកគេហើយបម្រុងរត់គេចខ្លួនឈ្មោះស៊ិន សុភ័ក្រ អាយុ១៨ឆ្នាំ ស្នាក់នៅផ្ទះជួលម្តុំផ្សារដើមគរ ខណ្ឌទួលគោក មុខរបរជាអ្នកស៊ីឈ្មួលដឹកត្រីចំហុយឲ្យគេ ជិះម៉ូតូម៉ាកគុប ពណ៌ស្លែ ពាក់ស្លាកលេខភ្នំពេញ 1BS 03 05 ។
ចំណែកជនរងគ្រោះមិនត្រូវបានស្គាល់អត្តសញ្ញាណទេដោយជនរងគ្រោះសន្លប់ មិនដឹងខ្លួន។ បច្ចុប្បន្នសមត្ថកិច្ចធ្វើការវាស់វែងរួចក៏បញ្ជូនម៉ូតូជនបង្ករនិង រទេះជនរងគ្រោះទៅកាន់ការិយាល័យចរាចរខណ្ឌចំការមន ដើម្បីធ្វើការសម្របសម្រួល ដោះស្រាយនៅពេលក្រោយ៕ ហេង នាង
