គ.ជ.ប មិនទុកចិត្តលើលទ្ធផលខុសគ្នានៃបញ្ជីសវនកម្មរបស់ក្រុមអង្គការសង្គមស៊ីវិល
Cambodia News
ភ្នំពេញ៖ នៅព្រឹកថ្ងៃទី០៣ ខែមេសានេះ ក្នុងកិច្ចប្រជុំការងាររបស់គណៈបញ្ជាការសន្តិសុខអចិន្ត្រៃយ៍ សម្រាប់ការបោះឆ្នោត ជ្រើសតាំងតំណាងរាស្ត្រ នីតិកាលទី៥ ឆ្នាំ២០១៣ នៅក្រសួងមហាផ្ទៃប្រធាន គ.ជ.ប លោក អ៊ឹម សួស្តី បានលើកឡើងថា គណៈ កម្មធិការជាតិរៀបចំការបោះឆ្នោត (គ.ជ.ប) បង្ហាញជំហរមិនជឿទុកចិត្តលើបញ្ជីសវនកម្មឈ្មោះអ្នកបោះឆ្នោត របស់អង្គការសង្គមស៊ីវិលពីរក្រុម បន្ទាប់ពីរកឃើញថា លទ្ធផលនៃបញ្ជីទាំងពីរនោះមិនដូចគ្នា។
សង្គមស៊ីវិលពីរក្រុមនោះ មានអង្គការចំនួនបួន គឺអង្គការឃ្លាំមើលការបោះឆ្នោត ហៅកាត់ថា និចហ្វិច វិទ្យាសា្ថនជាតិប្រជាធិបតេយ្យ NDI អង្គការ CAS និងអង្គការខុមហ្វ្រែល។
លោក អ៊ឹម សួស្តី មានប្រសាសន៍ថា ការធ្វើបញ្ជីសវនកម្មរបស់ក្រុមអង្គការសង្គមស៊ីវិលទាំងពីរក្រុម នោះ ធ្វើឡើង គឺដើម្បីព្យាយាមបូកបន្ថែមការដាក់បន្ទុក ខណៈមានមតិច្រើនមិនចង់ទទួលស្គាល់លទ្ធផលនៃការបោះឆ្នោតតែប៉ុណ្ណោះ។
ជាមួយគ្នានេះ របាយការណ៍សិក្សាស្រាវជ្រាវរបស់ខុមហ្វ្រែលកម្រាស់៥៨ទំព័រ ចេញផ្សាយក្នុងខែមេសានេះ បង្ហាញថា គ.ជ.ប មានកំហុសនៅពេលធ្វើវិសោធនកម្មនៃដំណើរការពិនិត្យបញ្ជីឈ្មោះ ដែលអាចធ្វើឲ្យអ្នកមានសិទ្ធិបោះឆ្នោត១លាន២សែន៥ម៉ឺននាក់ បាត់ឈ្មោះ។ របាយការណ៍ ក៏បានរកឃើញដែរថា គ.ជ.ប បានចុះឈ្មោះលើសចំនួនពិតជាក់ស្តែងចំនួន៣សែន៕
