លោក ហ៊ុន សែន ចេញទៅចូលរួមកិច្ចប្រជុំកំពូលអាស៊ាន នៅប្រ៊ុយណេ
ភ្នំពេញ៖ នៅថ្ងៃទី៨ ខែតុលា នេះ លោកហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានដឹកនាំគណៈប្រតិភូជាន់ខ្ពស់ អញ្ជើញទៅចូលរួមកិច្ចប្រជុំកំពូលអាស៊ាន លើកទី២៣ និងកិច្ចប្រជុំកំពូលពាក់ព័ន្ធ នៅប្រទេសប្រ៊ុយណេ ដែលកិច្ចប្រជុំនេះនឹងធ្វើឡើងនៅថ្ងៃទី៩ និងថ្ងៃទី១០ ខែតុលា ឆ្នាំ២០១៣។
អញ្ជើញអមដំណើរជាមួយលោកនាយករដ្ឋមន្ត្រី ហ៊ុន សែន រួមមាន លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការ អន្តរជាតិ, លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងពាណិជ្ជ កម្ម , លោក អូន ព័ន្ធមុន្នីរ័ត្ន រដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ, លោក ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡា និងសមាជិកដទៃទៀត នៃរាជរដ្ឋាភិបាលកម្ពុជា។
ក្រៅកិច្ចប្រជុំ កំពូលទាំងនោះ សម្តេចអគ្គមហាសេនាបតីតេជោ ហ៊ុន សែន នឹងជួបពិភាក្សាទ្វេភាគីជាមួយលោក តូនី អាបបុត នាយករដ្ឋមន្ត្រីអូស្ត្រាលី និង លោក ចន ឃី នាយករដ្ឋមន្ត្រីនូវែលហ្សេឡង់ និង លោក បាន គីមូន អគ្គលេខាធិការអង្គការសហប្រជាជាតិ។
តាម ការគ្រោងទុក លោក នាយករដ្ឋមន្ត្រី ហ៊ុន សែន នឹងអញ្ជើញមាតុភូមិនិវត្តន៍វិញ នៅរសៀលថ្ងៃទី១០ ខែតុលា ឆ្នាំ២០១៣៕ Cambodia News
