សម្តេច ហ៊ុន សែន ប្រតិកម្មតបចំពោះការចោទប្រកាន់របស់លោក សម រង្ស៊ី
សារព័ត៌មាន Cambodia News/
រាជធានីភ្នំពេញ (១៥ សីហា ២០១៨) ៖ សម្តេចនាយករដ្ឋមន្ត្រី ហ៊ុន សែន បានប្រតិកម្មតបទៅលោក សម រង្ស៊ី ដែលបានចោទសម្តេចថា បានជួលឃាតករទៅសម្លាប់លោក សម រង្ស៊ី ដល់ស្រុកបារាំង។ សម្តេចលើកឡើងបែបនេះនៅព្រឹកថ្ងៃទី១៥ ខែសីហា ឆ្នាំ២០១៨នេះ ខណៈចុះជួបសំណេះ សំណាលជាមួយកម្មករកម្មការិនីរាប់ម៉ឺននាក់នៅរោងចក្រតំបន់ភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ។
សម្តេច ហ៊ុន សែន បានថ្លែងថា បើសម្តេចមានបំណងចង់ធ្វើឃាតលោក សម រង្ស៊ី មែន នោះ គឺវាងាយណាស់ កាលពីលោក សម រង្ស៊ី នៅក្នុងស្រុកខ្មែរ ហើយគ្រាន់តែគប់នឹងផ្លែត្របែក ក៏វាងាប់ដែរ តើចាំបាច់អីត្រូវធ្វើនៅពេលនេះ។ សម្តេចថា អានេះវាចង់ងាប់មែនទែនហើយ ប៉ុន្តែសម្រាប់សម្តេចគឺមិនចង់ឲ្យខ្មែរណាម្នាក់ត្រូវសម្លាប់នោះទេ សូម្បីតែខ្មែរក្រហមដែលជាអ្នកសម្លាប់យើងនោះក៏សម្តេចបានឲ្យគេ១ម៉ឺនដុល្លារក្នុងមួយគ្រួសារ ដើម្បីយកទៅធ្វើដើមទុនកវែក កឆ្នាំងបន្តទៀត៕
