ក្មេងស្រីរងគ្រោះ ២នាក់ចោទប្រកាន់លើលោកស្រីលី ពៅ ជាអ្នកធ្វើទារុណកម្ម
Cambodia News
ភ្នំពេញ ៖ កាលពីព្រឹកថ្ងៃទី២៧ ខែមីនា ក្មេងស្រី ២នាក់ ដែលរងគ្រោះដោយសារការធ្វើទារុណកម្មពីលោកស្រីលី ពៅ ភរិយាលោកឧកញ៉ាវែង លីតិចឡា បានចូលទៅបំភ្លឺនៅតំណាងអយ្យការសាលាដំបូងរាជធានីភ្នំពេញ ។
ក្មេងស្រីរងគ្រោះ នាងសង់ គន្ធា អាយុ១៧ឆ្នាំ និងនាងម៉ក់ ផល្លី អាយុ១៧ឆ្នាំដែរ គឺជាកូនចិញ្ចឹមក្នុងគ្រួសារលោកឧកញ៉ាវែង លីតិចឡា បានចូលខ្លួនទៅបំភ្លឺនៅតំណាងអយ្យការតាមរយៈមេធាវី អង្គការស៊ីសា ដែលការសាកសួរនេះបានធ្វើឡើងពេញ១ថ្ងៃ ។
ក្រោយពីសាកសួរ បើតាមការបង្ហើបឱ្យដឹងពីតំណាងអយ្យការគឺនាងទាំង២នាក់បានចោទ ប្រកាន់លើលោកស្រីលី ពៅ ជាអ្នកធ្វើទារុណកម្មឥតល្ហែ ដើម្បីដាក់ជូនទៅចៅក្រមស៊ើបសួរចាត់ការតាមនីតិវិធីបន្ដទៀត ។ ដោយឡែកលោកឧកញ៉ាវែង លីតិចឡា ព្រះរាជអាជ្ញារងមិនបានចោទប្រកាន់ទេ ដោយយោងទៅលើរបាយការណ៍សន្និដ្ឋានរបស់សមត្ថកិច្ចដែលបញ្ជាក់ថា លោកឧកញ៉ាមិនពាក់ព័ន្ធក្នុងរឿងនោះ៕