បុរសម្នាក់ត្រូវរថយន្តដឹកស៊ីម៉ង់កិនស្លាប់
Cambodia News
ភ្នំពេញ ៖ កាលពីវេលាម៉ោង ១៦និង០០នាទី ថ្ងៃទី២៧ ខែមិនា បុរសម្នាក់ជិះម៉ូតូវ៉ារថយន្តរេចង្កូតចូលទៅបុករថយន្តដឹកស៊ីម៉ង់មួយគ្រឿងទៀតបណ្តាល ឲ្យស្លាប់ភ្លាមៗនៅនឹងកន្លែងកើតហេតុនៅលើកំណាត់ផ្លូវជាតិលេខ៤ ស្ថិតក្នុងភូមិជម្ពូវ័ន សង្កាត់ចោមចៅ ខណ្ឌពោធិ៍សែនជ័យ ។
តាមប្រភពព័ត៌មានពីកន្លែងកើតហេតុបានឲ្យដឹងថា បុរសរងគ្រោះខាងលើនេះ ឈ្មោះ សុខ ក្រូច អាយុ៧៧ឆ្នាំ មានទីលំនៅភូមិពោង ឃុំសំបួរមាស ស្រុកមុខកំពូល ខេត្តកណ្តាល។
មុនពេលកើតហេតុ បុរសរូបនេះបានជិះម៉ូតូមួយគ្រឿងម៉ាកឌ្រីមសេ១២៥ ស៊េរី២០០៥ ពណ៌ខ្មៅ ក្នុងល្បឿនយ៉ាងលឿនបើកវ៉ារថយន្តមួយគ្រឿងម៉ាកកុងតឺន័រដែលជិះ នៅខាងមុខ ស្របទិសគ្នា ពីកើតទៅលិច ក៏បណ្តាលឲ្យរេចង្កូតជ្រុលទៅបុករថយន្តដឹកស៊ីម៉ង់មួយគ្រឿងទៀត ម៉ាក FUSO ពណ៌ខៀវ ដែលបើកបរបញ្ច្រាសទិសគ្នា បណ្តាលឲ្យដួលស្លាប់ភ្លាមៗនៅនឹងកន្លែងកើតហេតុ។
ក្រោយពេលកើតហេតុ រថយន្តដឹកស៊ីម៉ង់បានបើករត់គេចខ្លួនបាត់ ចំណែកជនរងគ្រោះត្រូវបានសមត្ថកិច្ចទំនាក់ទំនងទៅក្រុមគ្រួសារឲ្យមក ទទួលយកទៅធ្វើបុណ្យតាមប្រពៃណី៕ ហេង នាង
