ទ័ពកូរ៉េខាងជើងប្រុងជើងវាយអាមេរិក
នៅថ្ងៃអង្គារទី ២៦មីនាឆ្នាំ២០១៣នេះ កូរ៉េខាងជើងបានគំរាម ជាថ្មីម្តងទៀត ថានឹងអាចនឹងវាយប្រហារ សហរដ្ឋអាមេរិក ព្រមទាំងកោះហ្គាំ (Guam) និងកោះហាវ៉ៃ (Hawaï) ដោយបាញ់មីស្ស៊ីល។ ព្យុងយ៉ាងហាក់ដូចជាបានប្រកាសអាសន្នដាក់បញ្ជាឱ្យពលទាហានរបស់ ខ្លួនស្ថិតក្នុងស្ថានភាពត្រៀម ប្រយុទ្ធទៀតផង។ តើនេះអាចចាត់ទុកថាជាគំរាមពិតប្រាកដ មែនទែនខុសពីទម្លាប់មុនៗ ឬយ៉ាងណា ?!
ជាច្រើនសប្តាហ៍មកហើយដែល កូរ៉េខាងជើង បានស្រែកគំរាម កាន់តែច្រើនខ្លាំងឡើងៗ ប៉ុន្តែសំដីចុងក្រោយនេះ មានលក្ខណៈច្បាស់លាស់ ខុសសព្វមួយដង និងគួរឱ្យព្រួយបារម្ភមែនទែន។
ភ្នាក់ងារសារព័ត៌មានផ្លូវការនៃរបបក្រុងព្យុងយ៉ាង បានប្រកាសថាទាហានកូរ៉េខាងជើងបានទទួលបទបញ្ជាប្រយុទ្ធរួចហើយ។ កងពលពិសេសផ្នែកយុទ្ធ សាស្ត្រមីស្សីល និងកាំភ្លើងធំបាញ់រយៈឆ្ងាយ ក៏ស្ថិតក្នុងឥរិយាបថត្រៀមអាសន្ន និងត្រៀមបាញ់ សហរដ្ឋអាមេរិក បាញ់ឆ្ពោះទៅកោះហ្គាំ និងកោះហាវ៉ៃ ក្នុងមហាសមុទ្ទប៉ាស៊ីហ្វិកដែលមានមូលដ្ឋានទ័ពអាមេរិកឈរជើងនៅ ទីនោះ។
ទោះបើការបាញ់សាកល្បងមីស្ស៊ីលកាលពីថ្ងៃទី ១២កុម្ភៈ ២០១៣ បានទទួលជោគជ័យក៏ដោយ ក៏អ្នកឯកទេសយល់ថាព្យុងយ៉ាងមិនទាន់មានសមត្ថភាពផ្នែកបច្ចេកទេស គ្រប់គ្រាន់អាចបាញ់បង្ហោះមីស្ស៊ីលអន្តរទ្វីប វាយប្រហារសហរដ្ឋអាមេរិកដល់ទេ។ មីស្ស៊ីលរយៈមធ្យមដែលកូរ៉េមាន មិនអាចបាញ់ដល់កោះហ្គាំ និងហាវ៉ៃ ផង។
ចុះបើកូរ៉េខាងជើងបាញ់ដល់ ?! ការប្រកាសក្តែងៗរបស់ព្យុងយ៉ាងនៅតែជាប្រភពនៃក្តីព្រួយបារម្ភ ។ គ្រោះនៃការផ្ទុះសង្គ្រាម បានឡើងដល់កំរិតកំពូលមិនធ្លាប់មាន។ កាលពីថ្ងៃសុក្រទី ២២មីនា ២០១៣ វ៉ាស៊ីនតោន និងសេអ៊ូលបានពង្រឹងលក្ខខណ្ឌសហប្រតិបត្តិការយោធា ដោយអាមេរិកប្រកាសការពារនិងគាំទ្រកូរ៉េខាងត្បូង ទល់រាល់នឹងទង្វើ បង្កហេតុ របស់កូរ៉េខាងជើង សូម្បីតែបន្តិចបន្តួចក៏ដោយក្តី។
នៅក្នុងប្រទេសកូរ៉េខាងត្បូងវិញ សេអ៊ូលស្តាប់ការគំរាមកំហែងដោយស្ងប់ស្ងាត់បំផុត។ ប្រតិកម្មផ្លូវការពុំទាន់មាន បណ្តាញឃោសនាព័ត៌មាន ទូរទស្សន៍ជាតិ ក៏មិនផ្អាកកម្មវិធីផ្សាយរបស់ខ្លួនដើម្បីជូនដំណឹងអំពីការព្រមាន របស់ព្យុងយ៉ាងនេះទេដែរ៕ដោយ អៀង សុខម៉ិញ(RFI)