ព្រះមហាក្សត្រ និងសម្តេចម៉ែ យាងនិវត្តន៍ពីក្រុងប៉េកាំងវិញ
Cambodia News
ភ្នំពេញ៖ កាលពីរសៀលថ្ងៃទី២៦ ខែមីនា ឆ្នាំ២០១៣ ព្រះករុណាព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី និងសម្តេចព្រះវររាជមាតា នរោត្តម មុនិនាថ សីហនុ បានយាងនិវត្តន៍មកដល់មាតុប្រទេសវិញហើយ បន្ទាប់ពីបានគង់ប្រថាប់ និងព្យាបាលព្រះរាជសុខភាពអស់រយៈពេលជាង៣សប្តាហ៍នៅទីក្រុងប៉េកាំង ប្រទេសចិន។
យោងតាមទីភ្នាក់ងារព័ត៌មាន AKP យាង និងទទួលព្រះរាជដំណើរព្រះមហាក្សត្រ និង សម្ដេចម៉ែ នៅព្រលានយន្តហោះអន្តរជាតិ ភ្នំពេញ គេសង្កេតឃើញមានវត្តមានលោក ហេង សំរិន ប្រធានរដ្ឋសភា លោកនាយករដ្ឋមន្ត្រី ហ៊ុន សែន មន្ត្រីអ្នកមុខ អ្នកការ និងរាជវង្សានុវង្សជាច្រើនរូបទៀត រួមទាំងឯកអគ្គរដ្ឋទូតចិនប្រចាំនៅកម្ពុជាផងដែរ។
គួរបញ្ជាក់ផងដែរថា ព្រះមហាក្សត្រ និងសម្តេចម៉ែ បានយាងទៅកាន់ក្រុងប៉េកាំង កាលពីថ្ងៃទី២១ ខែកុម្ភៈ ឆ្នាំ២០១៣ កន្លងទៅនេះ ហើយព្រះរាជវត្តមានរបស់ព្រះអង្គទាំងទ្វេរ ទទួលបាននូវការស្វាគមន៍យ៉ាងកក់ក្តៅពីសំណាក់ថ្នាក់ដឹកនាំជាន់ខ្ពស់ របស់ចិន៕
