ក្រុមខ្មាន់កាំភ្លើងជិះរថយន្ត ដេញបាញ់នារីម្នាក់
Cambodia News
ភ្នំពេញ៖ កាលពីម៉ោង១និង៤០នាទីរំលងអាធ្រាត្រ ឈានចូលថ្ងៃទី២៣ ខែមីនា ខ្មាន់កាំភ្លើងមួយក្រុមជិះរថយន្ត១គ្រឿងដេញបាញ់នារី ម្នាក់ តាមបណ្តោយផ្លូវសារធារណៈ បណ្តាលឲ្យមនុស្សប្រុសម្នាក់ ស្រីម្នាក់ រងរបួសធ្ងន់ ហេតុការណ៍នេះកើតឡើងកើតឡើង ផ្តើមចេញពីខណ្ឌទួលគោក បន្តដល់ខណ្ឌ៧មករា និងខណ្ឌដូនពេញ។
បុរសរងគ្រោះទី1ឈ្មោះ គង់ នូរិទ្ធិ អាយុ32ឆ្នាំ ត្រូវក្រុមខ្មាន់កាំភ្លើងបាញ់ចំភ្លូវខាងឆ្វេង1គ្រាប់ ចំណែកនារីរងគ្រោះជាអ្នកបើករថយន្ត ឈ្មោះ វង ស្រីអូន អាយុ20ឆ្នាំ រងរបួសត្រង់ស្មាខាងឆេ្វង និងក្បាល។
ប្រភពដដែលបន្តថា មុនពេលកើតហេតុជនរងគ្រោះបើកបរតាមបណ្តោយផ្លូវកម្ពុជាក្រោម រហូតចំណុចភ្លើងស្តុបណានជីង ក៏បើកជែងរថយន្តបង្ក ម៉ាកឡង់រ៉ូវែ ពណ៍ស អត់ស្លាកលេខ ស្រាប់តែក្រុមជនបង្កបើករថយន្តដេញតាមពីក្រោយ និងធ្វើសកម្មភាពបាញ់ទៅលើជនរងគ្រោះជាច្រើនគ្រាប់ តែបាញ់ត្រូវចំនួន២គ្រាប់ ( ប្រុសមួយគ្រាប់ ស្រីជាអ្នកបើករថយន្តមួយគ្រាប់ ) ហើយចំណុចដែលជនបង្កបាញ់ទៅលើជនរងគ្រោះគឺនៅក្នុងខណ្ឌទួលគោក ខណៈនោះជនរងគ្រោះព្យាយាមបើករត់គេចដល់ចំណុចមុខ ទីស្តីការគណៈរដ្ឋមន្ត្រី តែក្រុមជនបង្កនៅតែតាមដេញបាញ់រហូតទៅដល់មុខមន្ទីរពេទ្យកាលម៉ែត្រ ទើបឈប់ ព្រោះជនរងគ្រោះបើករថយន្តចូលក្នុងមន្ទីរពេទ្យ។
ក្រោយកើតហេតុក្រុមជនបង្កបើករថយន្តគេចខ្លួនបាត់ ចំណែកជនរងគ្រោះបើករថយន្តចូលទៅសម្រាកព្យាបាលនៅមន្ទីរពេទ្យកាល់ ម៉ែត្រដោយខ្លួនឯង ហើយសមត្ថកិច្ចទាំង៣ខណ្ឌកំពុងតាមប្រមាញ់ក្រុមខ្មាន់កាំភ្លើងទាំងនោះ៕ ហេង នាង
