បុរសម្នាក់បើករថយន្តបុកម៉ូតូកង់បីស្លាប់ម្នាក់របួសធ្ងន់ ២នាក់
Cambodia News
ភ្នំពេញ៖កាលពីវេលាម៉ោង២និង៣០នាទីទាបភ្លឺ ថ្ងៃទី២៥ ខែមិនា រថយន្តមួយគ្រឿងបើកបុករ៉ឺម៉កម៉ូតូ នៅចំណុចមុខផ្ទះលេខ១០៥ ផ្លូវលេខ១៨២ សង្កាត់អូឬស្សីទី២ ខណ្ឌ៧មករា បណ្តាលឲ្យអ្នករត់រ៉ឺម៉កម៉ូតូកង់បីម្នាក់ និងអ្នករួមដំណើរម្នាក់ទៀត បានរងរបួសធ្ងន់ ហើយអ្នកជិះរ៉ឺម៉កម៉ូតូម្នាក់ទៀត បានស្លាប់បាត់បង់ជីវិត។
តាមប្រភពពត៌មានទាក់ទិននឹងហេតុការណ៍ខាងលើនេះ បានឲ្យដឹងថា មុនពេលកើតហេតុ រថយន្តបង្កឡិចស៊ីស RX300 ពណ៌ខ្មៅ ពាក់ស្លាកលេខ ភ្នំពេញ 2L-5352 បើកបរដោយបុរសម្នាក់ ធ្វើដំណើរតាមបណ្តោយផ្លូវលេខ៨២ ក្នុងទិសដៅពីលិចទៅកើត លុះដល់ចំណុចកើតហេតុ រថយន្តបានគេចរបាំងថ្មចែកទ្រូងផ្លូវ ក្នុងល្បឿនលឿន ចូលទៅឆ្វេងដៃ ហើយជ្រុលល្បឿនបុករ៉ឺម៉កម៉ូតូដែលបើកបរដឹកនារីពីរនាក់ចេញពី ធ្វើការយប់ ធ្វើដំណើរតាមបណ្តោយផ្លូវលេខ១៨២ ក្នុងទិសដៅពីកើតទៅលិច បណ្តាលឲ្យរ៉ឺម៉កម៉ូតូខ្ទាតទៅខ្ទប់នឹងជញ្ជាំងផ្ទះ រងការខូចខាតយ៉ាងដំណំ ហើយបង្កឲ្យមានសោកនាដកម្មស្លាប់ម្នាក់ របួសធ្ងន់២នាក់។
ក្រោយពេលកើតហេតុ អ្នកបើកបររថយន្តត្រូវបានសមត្ថកិច្ចចាប់ខ្លួន ជាប់ភ្លាមៗ ប៉ុន្តែមិនទាន់ដឹងអត្តសញ្ញាណនៅឡើយទេ ចំណែកឯអ្នករងរបួស ត្រូវបញ្ជូនទៅសង្គ្រោះនៅមន្ទីរពេទ្យកាល់ម៉ែត ហើយអ្នកស្លាប់ត្រូវរថយន្តដឹងសាមុយដឹកទៅតំកល់នៅវត្តទឹកថ្លា៕ ហេង នាង
