អត្រានៃការប្រើប្រាស់ស្រោមអនាម័យនៅមានកម្រិតទាបនៅឡើយ
Cambodia News
ភ្នំពេញ៖ នៅក្រោយកិច្ចប្រជុំ ផ្សព្វផ្សាយលទ្ធផល ស្តីពីការអង្កេត រកអត្រាជំងឺកាមរោគ នៅកម្ពុជាឆ្នាំ២០១១ នៅ ព្រឹកថ្ងៃទី២២ ខែមីនា ឆ្នាំ២០១៣ នាសណ្ឋាគារហ៊ីម៉ាវ៉ារី លោកវេជ្ជបណ្ឌិត មាន ឈីវុន ប្រធានមជ្ឈមណ្ឌលជាតិ ប្រយុទ្ធនឹងជំងឺអេដស៍ សើស្បែក និងកាមរោគ បានមានប្រាសាន៍ថា ការ ប្រើប្រាស់ ស្រោមអនាម័យនៅមានកម្រិតទាបនៅឡើយ។
លោកវេជ្ជបណ្ឌិតបន្តថា អត្រានៃការប្រើប្រាស់ស្រោមអនាម័យក្រោម ៥០ ភាគរយ ចំពោះអ្នក ដែលមានដៃគូស្នេហា ឬហៅម្យ៉ាងទៀត ថា ជាដៃគូស្មោះស្ម័គ្រ ដែលភាគច្រើន ពួកគេធ្វើការរួមភេទជាមួយគ្នា ដោយមិនបានប្រើប្រាស់ ស្រោមអនាម័យឲ្យបាន ១០០ ភាគរយ នោះទេដោយសារតែពួកគេ មានការជឿជាក់ លើដៃគូរួមភេទ របស់ខ្លួន ។
លោកវេជ្ជបណ្ឌិត បានបន្តទៀតថា ការប្រើប្រាស់ស្រោមអនាម័យ ឲ្យបានត្រឹមត្រូវ នៅពេលដែលមានការរួមភេទ ជាមួយដៃគូស្នេហានោះ គឹអាចជៀសវាង នូវការឆ្លង ឬក៏ចម្លងនូវមេរោគផ្សេងៗ ដែលនៅក្នុងនោះ មានមេរោគអេដស៍ កាមរោម ហើយ និងមេរោគរលាកថ្លើម ប្រភេទបេ ជាដើម។
បើតាមលោកវេជ្ជបណ្ឌិត មាន ឈីវុន តាមតួលេខ ផែនទី ដែលមជ្ឈមណ្ឌលជាតិ ប្រយុទ្ធនឹងជំងឺអេដស៍ សើស្បែក ធ្វើក្នុងឆ្នាំ២០១២ យើងរកឃើញថា មានស្រ្តីបំរើសេវាកំសាន្តសប្បាយ នៅទូទាំងប្រទេស មានចំនួន ៣៧.០០០ នាក់។ ស្រ្តីបំរើសេវា កំសាន្តសប្បាយ នៅតែជាក្រុមប្រឈមមុខខ្ពស់ ក្នុងការឆ្លងមេរោគអេដស៍ ដោយសារតែការរួមភេទ របស់ពួកគេ នូវមិនទាន់មាន សុវត្ថិភាពផងដែរ ៕