ពលរដ្ឋតំបន់បឹងកក់ទាមទារបញ្ចូលប្រជាពលរដ្ឋ៥៨គ្រួសារក្នុងទំហំដី១២,៤៤ហិកតា
ភ្នំពេញ: នៅព្រឹកថ្ងៃទី១៤ មីនា ២០១២នេះ ប្រជាពលរដ្ឋតំបន់បឹងកក់ជិត ១០០នាក់ បានប្រមូលផ្ដុំគ្នានៅមុខសាលារាជធានីភ្នំពេញ ដើម្បីទាមទារបញ្ចូលប្រជាពលរដ្ឋ ៥៨ គ្រួសារក្នុងទំហំដី ១២,៤៤ ហិកតា ដែលសម្ដេចតេជោប្រគល់ឲ្យ និងទាមទារបោះព្រំប្រទល់ដី ១២,៤៤ ហិកតា ឲ្យប្រជាពលរដ្ឋ ក្នុងតំបន់បឹងកក់ ដោយពុំមានពាក់ព័ន្ធជាមួយក្រុមហ៊ុន ស៊ូកា គូអ៊ីន។
ការប្រមូលផ្ដុំគ្នាតវ៉ានោះ តំណាងប្រជាពលរដ្ឋ ១៩ នាក់ ត្រូវបានមន្ត្រីសាលារាជធានីភ្នំពេញឲ្យចូលជួបពិភាក្សាក្នុងការរកដំណោះស្រាយ។ ក្រោយជួបពិភាក្សា តំណាងប្រជាពលរដ្ឋបានឲ្យដឹងថា ខាងភាគីសាលារាជធានីភ្នំពេញ បានសន្យាថា នឹងផ្ដល់ដំណឹងជូនវិញ នាសប្ដាហ៍ក្រោយ។
ក្រុមប្រជាពលរដ្ឋបាននិយាយថា នៅសប្ដាហ៍ក្រោយ បើគ្មានដំណោះស្រាយដល់ពួកគាត់ទេនោះ ពួកគាត់នៅតែបន្តធ្វើការតវ៉ាទាមទារ រហូតមានដំណោះស្រាយដល់ពួកគាត់៕