យុវជនពីរនាក់ឆក់កាបូបដៃពីស្រីពីរនាក់ត្រូវសម្ថកិច្ចចាប់ខ្លួនភា្លមៗ
Cambodia News
ភ្នំពេញ៖ កាលពីវេលាម៉ោង ២១និង០០នាទីយប់ ថ្ងៃទី២០ ខែមិនា ជនសង្ស័យពីរ នាក់ដែលជានិស្សិតឆ្នាំទី១ បានធ្វើសកម្មភាពឆក់កាបូបដៃ ពីក្រុមនិស្សិតស្រីពីរនាក់ ដែលកំពុងជិះម៉ូតូឌុបគ្នា សំដៅចូលទៅក្នុងមជ្ឈមណ្ឌលកោះពេជ្រ តែមិនបានសម្រេច ត្រូវសមត្ថកិច្ច ចាប់ឃាត់ខ្លួនភា្លមៗនៅចំណុចផ្លូវសាមិត សង្កាត់ទន្លេបាសាក់ ខណ្ឌចំការមន។
សមត្ថកិច្ចបានឲ្យដឹងថា ជនសង្ស័យពីរនាក់ខាងលើនេះ ទី១ឈ្មោះ រឿន រ៉ាវីដ ភេទប្រុស អាយុ២០ឆ្នាំ ជានិស្សិតឆ្នាំទី១ នៅសកលវិទ្យាល័យវើលវ៉ាយ ស្នាក់នៅផ្ទះលេខ១២ ផ្លូវលេខ៩ សង្កាត់ទន្លេបាសាក់ ខណ្ឌចំការមន និងទី២ឈ្មោះ ទូច ស៊ុនឡេង ភេទប្រុស អាយុ២០ឆ្នាំ ជានិស្សិតឆ្នាំទី១ ស្នាក់នៅសង្កាត់ស្ទឹងមានជ័យ ខណ្ឌមានជ័យ។
ចំណែកនិស្សិតស្រីរងគ្រោះពីរនាក់ខាងលើនេះទី១ឈ្មោះ ចាន់ រ៉ា អាយុ២៣ឆ្នាំ ជានិស្សិតឆ្នាំទី២ នៅសាកលវិទ្យាល័យអាស៊ីអឺរ៉ុប និងទី២ឈ្មោះ អាមួយ ជានិស្សិតឆ្នាំទី២ នៅសាកលវិទ្យាល័យអាស៊ីអឺរ៉ុបដូចគ្នា។
ជនរងគ្រោះបានរៀបរាប់ថា មុនពេលកើតហេតុ រូបនាងទាំងពីរនាក់បានជិះម៉ូតូមួយគ្រឿងម៉ាកស្កូបពី ពណ៌ផ្កាឈូក ស៊េរី២០១៣ ធ្វើដំណើរតាមបណ្តោយផ្លូវ សាមិត ក្នុងបំណងចូលទៅក្នុងកោះពេជ្រ ខណៈនោះស្រាប់តែមានយុវជនពីរនាក់ជិះម៉ូតូសេ១២៥ ស៊េរី២០១១ មកនិយាយសាសងជាមួយពួកនាងបានមួយសន្ទុះស្រាប់តែយុវជនទាំងពីរនាក់ ខាងលើបានធ្វើសកម្មភាពឆក់យកកាបូបដៃពីក្នុងឃ្លប់ម៉ូតូរបស់នាង ប៉ុន្តែឆក់មិនបានសម្រេចនោះទេ ហើយនាងបានស្រែកឆោឡោបណ្តាលឲ្យមានការភ្ញាក់ផ្អើលដល់សមត្ថកិច្ច ដែលកំពុងដើរល្បាតធ្វើការចាប់ឡោមព័ទ្ធបានភ្លាមៗតែម្តង។
បច្ចុប្បន្នជនសង្ស័យទាំងពីរនាក់ខាងលើនេះ ត្រូវសមត្ថកិច្ចនគរបាលប៉ុស្តិ៍ទន្លេបាសាក់កសាងសំណុំររឿងបញ្ជូនទៅ ឃុំខ្លួនបណ្តោះអាសន្ននៅអធិការដ្ឋាននគរបាលខណ្ឌចំការមន ដើម្បីសាកសួរបន្ត៕ ហេង នាង
