យុវជនម្នាក់ជិះម៉ូតូបុករថយន្តតាក់ស៊ីម៉ែត្ររងរបួសធ្ងន់ធ្ងរ
Cambodia News
ភ្នំពេញ៖ កាលពីវេលាម៉ោង ២រំលងអាធ្រាត្រឈានចូលថ្ងៃទី២០ ខែមិនា យុវជនម្នាក់បានរងរបួសយ៉ាងធ្ងន់ធ្ងរ ក្នុងខណៈដែលរូបគេជិះម៉ូតូ ហើយជ្រុលបុកចំក្បាលរថយន្តតាក់ស៊ីម៉ែត្រ បណ្ដាលឲ្យបោកខ្ទប់ទៅនឹងក្បាលរថយន្តរងរបួសធ្ងន់ធ្ងរ នៅចំណុចមុខណាហ្គាវើល ក្នុងសង្កាត់ទន្លេបាសាក់ ខណ្ឌចំការមន។
ជុំវិញហេតុការណ៍ខាងលើនេះ សមត្ថកិច្ចមូលដ្ឋានបានឲ្យដឹងថា មុនពេលកើតហេតុ គេបានឃើញយុវជនម្នាក់វ័យជាង២០ឆ្នាំ ស្ថិតក្នុងស្ថានភាពស្រវឹងស្រា បានជិះម៉ូតូមួយគ្រឿងម៉ាកសេ១២៥ ពណ៌ខ្មៅ ស៊េរី២០១៣ តាមបណ្ដោយផ្លូវព្រះសីហនុ កាត់មុខណាហ្គាវើល ក្នុងទិសដៅពីកើតទៅលិច បញ្ច្រាសទិសចរាចរណ៍ ដោយបានបើកយ៉ាងលឿន ហើយជ្រុលទៅបុករថយន្តតាក់ស៊ីម៉ែត្រ មួយគ្រឿង ពណ៌លឿង ពាក់ស្លាកលេខ ភ្នំពេញ 2M-5204 ដែលកំពុងបើកបរពីកើតទៅលិច តាមបណ្ដោយផ្លូវព្រះសីហនុ បណ្ដាលឲ្យយុវជនជាម្ចាស់ម៉ូតូសេ១២៥ ហោះផ្លោងបោកខ្ទប់ទៅនឹងក្បាលរថយន្តតាក់ស៊ីម៉ែត្រ រងរបួសធ្ងន់ធ្ងរ។
ក្រោយកើតហេតុជនរងគ្រោះត្រូវបានសមត្ថកិច្ចហៅរថយន្តសាមុយដឹកយកទៅសង្គ្រោះនៅ មន្ទីរពេទ្យ ចំណែករថយន្តតាក់ស៊ីម៉ែត្រវិញនោះ ត្រូវម្ចាស់បើកយកទៅជួសជុល ដោយមិនទាមទារសំណងពីយុវជនបើកម៉ូតូបង្កហេតុ៕ ហេង នាង
