លោក ហ៊ុន សែន វាយប្រហារខ្លាំងៗ ទៅប្រទេស ដែលតែងតែស្តីបន្ទោសដល់កម្ពុជា
Cambodia News
ភ្នំពេញ៖ ក្នុងកម្មវិធី សម្ពោធ បើកជាផ្លូវការ ក្រុមប្រឹក្សាជាតិអភិវឌ្ឍន៍បៃតង និងអគ្គលេខាធិការដ្ឋាន នៃក្រុមប្រឹក្សាជាតិ អភិវឌ្ឍន៍ បៃតង ព្រមទាំងការចែកជូន នូវគោលនយោបាយជាតិ ស្តីពីការអភិវឌ្ឍន៍ បៃតង និងផែនការយុទ្ធសាស្រ្តជាតិ ស្តីពីការអភិវឌ្ឍន៍បៃតង ឆ្នាំ២០១៣-២០៣០ នាព្រឹកថ្ងៃទី១៩ ខែមីនា ឆ្នាំ២០១៣ នាវិមានសន្តិភាព លោកនាយករដ្ឋមន្រ្តី ហ៊ុន សែន បានវាយប្រហារខ្លាំងៗ ទៅ ប្រទេស មួយចំនួនដែលតែងតែ ស្តីបន្ទោស ដល់ប្រទេសកម្ពុជា ទាក់ទងនឹងសិទ្ធិមនុស្ស។
លោកនាយករដ្ឋមន្រ្តី មិនបានបញ្ជាក់ឈ្មោះត្រង់ៗ ចំពោះប្រទេសណា ដែលតែងតែ វាយមកប្រទេសកម្ពុជា នោះទេ ប៉ុន្តែគេអាចដឹងថា ប្រទេសនោះ ជាប្រទេសមហាអំណាច ពិភពលោកតែម្តង ដោយលោក បានប្រៀបធៀប ករណីប្រទេសកម្ពុជា ជាមួយនឹងប្រទេសថៃ ប៉ុន្តែគ្មានអ្នកណាហ៊ានជេរ និងបន្ទោសដល់ ប្រទេសថៃ នោះឡើយ។
លោកបានបញ្ជាក់ថា «ថាក់ស៊ីន មិនទាន់បានចូលស្រុក នៅឡើយទេ ហើយនៅទីនោះ ឲ្យតែរំលាយ បក្សហើយ កាត់សិទ្ធិនយោបាយ ទៀតហើយមានអ្នកណា ដែលហ៊ានផ្តល់ទូន្មាន ដល់ប្រទេសថៃ។ ឯនៅកម្ពុជាអត់ទាន់ មានរំលាយគណបក្សនយោបាយ ណាមួយទេរឿងនេះ បើបុគ្គលធ្វើ ខុស វាជារឿងរបស់បុគ្គល មិនអាចយករឿង នយោបាយ មកលូកឡំ ហើយកាត់សិទ្ធនយោបាយ ដែលគេ គ្មានកំហុស រឿងរំលាយគណបក្ស នយោបាយដូចនៅ ប្រទេសថៃនោះទេ៕
