ជនសង្ស័យផ្ទុះអាវុធ ៣គ្រាប់របួសសមត្ថកិច្ចម្នាក់
ភ្នំពេញ៖ កាលពីវេលាម៉ោង៧និង៤០នាទី យប់ ថ្ងៃទី៤ ខែមីនាមានការ ភ្ញាក់ផ្អើលមួយបានកើតឡើងដោយសារស្នូរសំឡេងផ្ទុះអាវុធ៣គ្រាប់ បណ្ដាលឲ្យសមត្ថកិច្ចដែលចុះទៅឡោមព័ទ្ធទីតាំងភោជនីយដ្ឋានយីហោស្រីរ៉ា ស្ថិតនៅតាម បណ្ដោយផ្លូវបេតុង២០១១ ក្នុងភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ ម្នាក់ រងរបួស ដែលគេសង្ស័យថាជា ករណីបង្ក្រាបគ្រឿងញៀន។
ប្រភពព័ត៌មានពីកន្លែងកើតហេតុបាន ឲ្យដឹងថា មុនពេលកើតហេតុគេឃើញសមត្ថកិច្ចចុះមកឡោមព័ទ្ធទីតាំង ភោជនីយដ្ឋានយីហោស្រីរ៉ា ខាងលើ ដោយមានការសង្ស័យទៅលើរថយន្តម៉ាកណាវ៉ារ៉ា គ្មានស្លាកលេខ១គ្រឿង រួចក៏មានបុរសម្នាក់ដើរចេញពីក្នុងភោជនីយដ្ឋានខាងលើហើយក៏មាន ផ្ទុះអាវុធចំនួន៣គ្រាប់បណ្ដាលឲ្យសមត្ថ កិច្ចម្នាក់រងរបួសតែម្តង។
គេនៅមិនទាន់ស្គាល់អត្តសញ្ញាណជន រងគ្រោះជាសមត្ថកិច្ចដែលត្រូវខ្មាន់កាំភ្លើងបាញ់ឲ្យរបួសនៅឡើយទេ ខណៈសមត្ថកិច្ចកំពុងធ្វើការឡោមព័ទ្ធនិងឆែកឆេរភោជនីយដ្ឋានខាងលើ៕ ហេង នាង
