ស្រវឹងស្រាឈប់ម៉ូតូដេក តាមចិញ្ចើមផ្លូវ ត្រូវចោរឆ្លៀតឱកាសយកទៅបាត់
ភ្នំពេញ ៖ កាលពីវេលាម៉ោង២និង១៥នាទីរំលងអធ្រាត្រឈានចូលថ្ងៃទី២២ ខែកុម្ភៈ បុរសម្នាក់ស្រវឹងស្រាឈប់ម៉ូតូដេកនៅលើចិញ្ចើមផ្លូវ នៅមុខអនុវិទ្យាល័យចតុមុខ តាមមហាវិថីព្រះនរោត្តម ក្នុងសង្កាត់ជ័យជំនះ ខណ្ឌដូនពេញ ត្រូវជនឆ្លៀតឱកាសទាញទម្លាក់ពីលើម៉ូតូយកម៉ូតូទៅបាត់។
យោងតាមសាក្សីដែលបានឃើញហេតុការណ៍បានឲ្យដឹងថា មុនពេលកើតហេតុគាត់បើករ៉ឺម៉កម៉ូតូកង់បីដឹកភ្ញៀវឆ្លងកាត់កន្លែង កើតហេតុនេះ គាត់បាន ឃើញបុរសដែលជាជនរងគ្រោះដេកនៅលើម៉ូតូមួយគ្រឿងមិនស្គាល់ម៉ាក ពណ៌ក្រហម នៅតាមចិញ្ចើមផ្លូវ ។
ខណៈពេលភ្ញៀវនៅលើរ៉ឺម៉កម៉ូតូបាននិយាយថាស្រវឹងស្រាដេកអញ្ចឹង ច្បាស់ជាមានចោរលួចម៉ូតូហើយ ។ លុះពេលគាត់ដាក់ភ្ញៀវចុះហើយបានបើករ៉ឺម៉កម៉ូតូត្រឡប់មកវិញ ស្រាប់តែឃើញបុរសម្នាក់នោះដេកនៅលើចិញ្ចើមផ្លូវក្រោមដើម ត្របែកព្រៃមិនឃើញមានម៉ូតូទេ ។ បុរសរូបនោះនៅជាប់អាវរបស់គាត់មាន ឈ្មោះ កង វុត្ថា ជាបុគ្គលិកប្រៃសណីយ៍ ស្នាក់នៅសង្កាត់អូឡាំពិក ខណ្ឌចំការមន ។
ហេតុការណ៍ធ្វើឲ្យសមត្ថកិច្ចដើរល្បាតតាមផ្លូវប្រទះឃើញបានដាស់ បុរសខាងលើឲ្យភ្ញាក់ ប៉ុន្តែដាស់យ៉ាងណាក៏មិនព្រមភ្ញាក់ដែរ ហើយ សមត្ថកិច្ចក៏បានបានឆែកឃើញមានទូរស័ព្ទមួយគ្រឿងនៅក្នុងហោប៉ៅ រួចសមត្ថកិច្ចក៏ ទំនាក់ទំនងទៅក្រុមគ្រួសារឲ្យមកយកត្រឡប់ទៅផ្ទះវិញ៕ ហេង នាង
