រថយន្តពីរគ្រឿងបុកគ្នារងរបួសធ្ងន់ស្រាល ៧នាក់
ភ្នំពេញ៖ កាលពីវេលាម៉ោង ៤និង១០នាទីទាបភ្លឺ ថ្ងៃទី២២ ខែកុម្ភៈ រថយន្តពីរគ្រឿងបានបុកគ្នាពេញទំហឹង រួញក្បាលជាប់គ្នា នៅតាមបណ្ដោយផ្លូវជាតិលេខ៦អា ក្រុមទី១ ភូមិគៀនឃ្លាំង សង្កាត់ព្រែកលាប ខណ្ឌឬស្សីកែវ។
ក្នុងហេតុការណ៍នេះ បណ្តាលឲ្យ កម្មករលើកឥដ្ឋ ដែលជិះនៅលើរថយន្តរងរបួសធ្ងន់ស្រាល៧នាក ដោយមានអ្នកខ្លះ ដាច់ដៃ ខ្លះបាក់ជើង ឯខ្លះទៀតគាបជាប់និងក្បាលរថយន្ត ប៉ុន្តែពួកគេត្រូវបានសមត្ថកិច្ចនិងប្រជាពលរដ្ឋជួយសង្គ្រោះទាន់ពេល វេលា ពុំមាននរណាម្នាក់ស្លាប់បាត់បង់ជីវិតឡើយ។
យោងតាមសេចក្ដីរាយការណ៍ពីកន្លែងកើតហេតុ បានឲ្យដឹងថា រថយន្តពីរគ្រឿងដែលបុកគ្នាខាងលើនេះ ទី១ ម៉ាក ហ៊ីយ៉ាន់ដាយ ពណ៌ខៀវ ពាក់ស្លាកលេខកណ្ដាល 3A-0013 ជិះដោយបុរស៤នាក់ ក្នុងទិសដៅពីត្បូងទៅជើង តាមបណ្ដោយផ្លូវជាតិលេខ៦អា ក្នុងល្បឿនលឿន បានបុករថយន្តមួយគ្រឿងទៀត ម៉ាក ហ៊ីយ៉ាន់ដាយដូចគ្នា ពណ៌ស ពាក់ស្លាកលេខ ភ្នំពេញ 3A-5364 ដឹកឥដ្ឋពេញក្នុងរថយន្ត ហើយជិះគ្នា៣នាក់ ក្នុងទិសដៅបញ្ច្រាសទិសគ្នា គឺពីជើងទៅត្បូង។
ខណៈបើកមកដល់ចំណុចកើតហេតុ រថយន្តម៉ាកហ៊ីយ៉ាន់ដាយ ពណ៌ស បានបើកគេចម៉ូតូមួយគ្រឿង ដែលជិះពីមុខ បណ្ដាលឲ្យរេចង្កូតពន្លះជាមួយក្បាលរថយន្តហ៊ីយ៉ានដាយ ពណ៌ខៀវ ដែលកំពុងបើកបរក្នុងល្បឿនលឿនដូចគ្នាបណ្ដាលឲ្យ ក្បាលរថយន្តទាំងពីរគ្រឿងរួញជាប់គ្នា និងរថយន្តហ៊ីយ៉ាន់ដាយ ពណ៌ស ក្រឡាប់ផ្ងារកិនពីលើរថយន្តហ៊ីយ៉ាន់ដាយ ពណ៌ខៀវ ធ្លាក់ឥដ្ឋរាយប៉ាយពេញផ្លូវ។
បន្ទាប់ពីកើតហេតុ សមត្ថកិច្ចបានចុះមកវាស់វែង ស្ទូចយករថយន្តទាំងពីរគ្រឿងទៅរក្សាទុកនៅ ការិយាល័យចរាចរជើងគោករាជធានីភ្នំពេញ ដើម្បីរងចាំដោះស្រាយតាមផ្លូវច្បាប់៕ ហេង នាង
