ស្ត្រីម្នាក់ រៀនបើករថយន្ត ជ្រុលបុកកន្លែងលក់សាច់អាំង
ភ្នំពេញ៖ កាលពីវេលាម៉ោង ២១និង៤០នាទីយប់ ថ្ងៃទី២១ ខែកុម្ភៈ ម៉ូតូស្កូបពីមួយគ្រឿង និងទីតាំងលក់មឹកអាំង បង្គាអាំង និងសាច់គោអាំងមួយកន្លែង ស្ថិតនៅតាមបណ្ដោយផ្លូវមុនីរ៉េត កែងផ្លូវលេខ៣១០ ក្នុងសង្កាត់ទួលស្វាយព្រៃទី២ ខណ្ឌចំការមន រងការខូចខាតយ៉ាងដំណំ ខណៈស្ត្រីម្នាក់ រៀនបើករថយន្តជ្រុលល្បឿនទៅបុក។
រថយន្តបង្កហេតុខាងលើនេះ ម៉ាក កូរ៉ូឡា ពណ៌ស្លែ ពាក់ស្លាកលេខ ភ្នំពេញ 2k-4022 បើកបរដោយស្ត្រីម្នាក់មិនស្គាល់អត្តសញ្ញាណ តាមបណ្ដោយផ្លូវព្រះមុនីរ៉េត ក្នុងទិសដៅពីកើតទៅលិច បញ្ច្រាសច្បាប់ចរាចរណ៍រហូតមកដល់ចំណុចកើតហេតុខាងលើ ក៏បានរេចង្កូតឡើងទៅលើខឿនបុករៈតុកៅអី និងរបស់របរលក់ដូរ រួមជាមួយម៉ូតូស្កូបពីមួយគ្រឿងដែលចតស្ងៀម បណ្ដាលឲ្យរងការខូចខាតយ៉ាងដំណំ ហើយរថយន្ត ក៏ជ្រុលទៅបុកគាបជាប់និងគល់ឈើ ទៅមុខលែងរួច។
ក្នុងហេតុការណ៍នេះ មិនបណ្ដាលឲ្យនរណាម្នាក់រងរបួសធ្ងន់ធ្ងរនោះទេ។ បន្ទាប់ពីកើតហេតុ ម្ចាស់រថយន្តធានារ៉ាប់រងចេញសងថ្លៃខូចខាតជូនភាគីរងគ្រោះទាំងស្រុង ៕ ហេង នាង
