គម្រោងស្ពានអាកាសស្ទឹងមានជ័យត្រៀមបើកការដ្ឋានសាងសង់
លោក កែប ជុតិមា អភិបាលរាជធានីភ្នំពេញបានមានប្រសាសន៍នៅក្នុងកិច្ចប្រជុំកាលពីចុងខែឧសភា កន្លងទៅថា សាលារាជធានីភ្នំពេញ បានត្រៀមបើកការដ្ឋានសាងសង់ស្ពានអាកាសទី៣ ដែលស្ថិតនៅ ក្បែរតំបន់ស្ពានស្ទឹងមានជ័យហើយ ខណៈពេលដែលស្ថានភាព នៃការធ្វើចរាចរឆ្លងកាត់ទៅមកនៅក្នុងតំបន់នេះពីមួយថ្ងៃទៅមួយថ្ងៃកាន់តែមានភាពមមាញឹក និងកកស្ទះយ៉ាងខ្លាំង។
លោក កែប ជុតិមា បានបន្តថា ជំហានដំបូងមុនការសាងសង់ចាប់ផ្តើម គឺយើងត្រូវ ធ្វើការដោះស្រាយផលប៉ះពាល់លំនៅដ្ឋាន របស់ ប្រជាពលរដ្ឋ រួមទាំងផលប៉ះពាល់ផ្សេងទៀតរបស់ស្ថាប័ន ដោយធ្វើយ៉ាងណាឱ្យមានភាពម៉ត់ចត់ជាទីបំផុត ស្របទៅតាមគោលការណ៍ណែនាំរបស់ក្រសួងសេដ្ឋកិច្ច និងហិរញ្ញវត្ថុ ហើយនិងនិតិវិធីច្បាប់ដែលមាន។
ទោះបីយ៉ាងណាគេមិនទាន់ច្បាស់នៅឡើយទេថា ការដោះស្រាយផលប៉ះពាល់នៃគម្រោងសាងសង់ស្ពានខាងលើនឹងបញ្ចប់នៅពេលណា ហើយការសាងសង់អាចចាប់ផ្តើមបាននៅពេលណាឱ្យពិតប្រាកដនៅឡើយទេពោល គឺគ្រាន់តែដឹងថា ប្រហែលជាអាចធ្វើឡើងបាននៅក្នុងពេលឆាប់ៗខាងមុខនេះតែប៉ុណ្ណោះ ។
ផ្អែកតាមគម្រោងសាងសង់ស្ពានអាកាសទី៣ នេះនឹងត្រូវគេធ្វើឡើងមានសណ្ឋាន និងរូបរាង ដូចជា សត្វមេអំបៅ ដែលកំពុងតែត្រដាងស្លាបហើរអ៊ីចឹង ពោលគឺមានស្ពានទាំងអស់ចំនួន៥ ក្នុងនោះមានស្ពាន មេចំនួន២ ស្ពានបែកខ្នែងចំនួន១ និងស្ពានឆ្លងកាត់ប្រឡាយស្ទឹងមានជ័យ ចំនួន២។
ស្ពានទាំងនេះ ក្រោយការសាងសង់រួច សង្ឃឹមថា អាចដោះស្រាយបានការកកស្ទះចរាចរ ជាពិសេសលំហូរមធ្យោបាយធ្វើដំណើរ ពីខេត្តកណ្តាល និងខេត្តតាកែវ មកកាន់ភាគកណ្តាល រាជធានីភ្នំពេញ បាន១០០ភាគរយតែម្តង៕