ឌុបសង្សារ ចេញពីធ្វើការត្រូវចោរឆក់កាបូប
ភ្នំពេញ៖ កាលពីវេលាម៉ោង១១និង៥០នាទីយប់ ថ្ងៃទី៧ កុម្ភៈ បុរសម្នាក់បានជិះម៉ូតូទៅឌុបសង្សារចេញពីធ្វើការ ត្រូវជនសង្ស័យ២នាក់ ជិះម៉ូតូមកដល់ ធ្វើសកម្មភាពឆក់យកកាបូបយកទៅបាត់ ស្ថិតនៅមុខ ផ្ទះអាយប្រ៊ែន ផ្ទះលេខ52A ផ្លូវលេខ១១៣ សង្កាត់វាលវង់ ខណ្ឌ៧មករា។
ប្រភពព័ត៌មានពីជនរងគ្រោះ បានឲ្យដឹងថា មុនពេលកើតហេតុ រូបគេជិះម៉ូតូសេ១១០ ស៊េរី២០១២ ពណ៌ខ្មៅ ទៅឌុបសង្សារចេញពីធ្វើការ ក្នុងគោលបំណងរកអីហូបបន្តិច រួចត្រឡប់ទៅផ្ទះវិញ ខណៈពេលជិះតាមផ្លូវលេខ១១៣ ពីត្បូងទៅជើង មកដល់ចំណុចខាងលើ ស្រាប់តែមានជនសង្ស័យ២នាក់ ជិះម៉ូតូសេ១២៥ ស៊េរី២០១៣ ពណ៌ខ្មៅ ក្នុងទិសដៅស្របគ្នាមកដល់ បានធ្វើសម្មភាពឆក់កាបូបពីនារីជាសង្សារ របស់គេ យកទៅបាត់ដោយសុវត្ថិភាព។
ស្ត្រីជាសង្សារនោះ បានឲ្យដឹងថា នៅក្នុងកាបូបដែលជនសង្ស័យឆក់ទៅបាត់នោះមានទូរស័ព្ទដៃ ម៉ាកអាយហ្វូន២គ្រឿង និងម៉ាកណូគា២គ្រឿង ជារបស់គេ២គ្រឿង ជារបស់សង្សារ២គ្រឿង លុយចំនួន២៧០ដុល្លារ និងលុយរៀលមួយចំនួនទៀត។
ក្រោយពេលកើតហេតុ ជនរងគ្រោះទាំងពីរនាក់ ត្រូវសមត្ថកិច្ចនាំទៅសាកសួរ និងដាក់ពាក្យបណ្តឹងនៅប៉ុស្តិ៍រដ្ឋបាលនគរបាលបឹងព្រលឹត នៅជិតកន្លែងកើតហេតុតែម្តង៕
ដោយ៖ ហេង នាង
