ពលរដ្ឋបារាំងនិងអង់គ្លេស នឹងពិបាកសុំកុមាររុស្ស៊ីយកទៅធ្វើជាកូនចិញ្ចឹម
មូលហេតុ តាមយោបល់បញ្ចេញ ព្រឹកថ្ងៃពុធនេះ ដោយអ្នកទទួលបន្ទុក ខាងការពារសិទ្ធិមនុស្ស នៅអមក្រសួងការបរទេសរុស្ស៊ី លោក Konstantin Dolgov គឺមកពីរដ្ឋសភាបារាំង និងអង់គ្លេស ទើបអនុម័តច្បាប់ដែលឲ្យភ្លើងខៀវដល់ ការរៀបអាពាហ៍ពិពាហ៍រវាងមនុស្សភេទដូចគ្នា។
ការ ដែលអាជ្ញាធរបារាំង និងអង់គ្លេស អនុញ្ញាតតាមផ្លូវច្បាប់ឲ្យមានអាពាហ៍ពិពាហ៍ រវាងមនុស្សភេទដូចគ្នា តាមសំដីលោក Konstantin Dolgov ជាអ្នកការទូតរុស្ស៊ី ដែលបំពាក់ទៅដោយសមត្ថកិច្ច ខាងការពារសិទ្ធិមនុស្សនៅរុស្ស៊ី គឺច្បាស់ជាបង្រួញឲ្យខើចទៅ នូវភ័ព្វសំណាងរបស់ពលរដ្ឋប្រទេសទាំងពីរនោះ សម្រាប់ទទួលកុមារកំព្រារុស្ស៊ី យកទៅធ្វើជាកូនចិញ្ចឹម។
នៅរុស្ស៊ី កុំថាដល់ទៅរៀបការរវាងមនុស្សភេទដូចគ្នា គ្រាន់តែឃោសនានៅតាមកន្លែង សាធារណៈ អំពីការរួមភេទបែបនេះ នៅពីមុខកុមារមិនទាន់ពេញវ័យ គឺត្រូវរងទណ្ឌកម្ម ទៅហើយ។ ជាក់ស្តែង កាលពីចុងខែមករាកន្លងទៅ សភាឌូម៉ាបានអនុម័តវិសោធនកម្មបន្ថែមទៅលើក្រមព្រហ្មទណ្ឌ ដែលប្រមើលឲ្យបង់ប្រាក់ពិន័យ ចំពោះការឃោសនាបែបនេះ ក្នុងទម្រង់ដូចតទៅ ៖ សម្រាប់ពលរដ្ឋធម្មតា គឺត្រូវបង់ដល់ ៥.០០០រូប្ល រឺ ១៧០ ដុល្លារ, សម្រាប់អ្នកមុខអ្នកការ គឺត្រូវបង់ដល់ ៥០.០០០រូប្ល រឺ ១.៧០០ ដុល្លារ, សម្រាប់នីតិបុគ្គល គឺត្រូវបង់ដល់ កន្លះលានរូប្ល រឺ ១ម៉ឺន៧ពាន់ដុល្លារ។
ប្រទេសរុស្ស៊ីដែលកាន់គ្រិស្តសាសនា អ័រថូដុក្ស វិន័យតឹង ប្រកាន់ជំហរជាសត្រូវដាច់ខាត ទល់នឹងការរួមរ័ក្សរវាងមនុស្សភេទដូចគ្នា ដោយចាត់ទុកការនេះជាឧក្រិដ្ឋកម្ម និងជាជម្ងឺរបស់មនុស្សដែលមានខួរក្បាលដើរមិនស្រួល។
គួររំលឹកថា គឺកាលពីថ្ងៃសោរ៍ទី២ កុម្ភៈកន្លងទៅ ទោះបីមានបាតុកម្មតវ៉ាភ្លូកទឹកភ្លូកដីក៏ដោយ ក៍សភាបារាំងជាទីដែលពួកអ្នកតំណាងរាស្ត្រខាងបក្សសង្គមនិយម មានអាសនៈភាគច្រើន លើសលុប ដោយបំពេញតាមពាក្យសន្យារបស់លោកប្រធានាធិបតីខាងបក្សនេះ ដោយសម្លេង ២៤៩ ដែលគាំទ្រ ទល់នឹងសម្លេងជំទាស់តែ ៩៧ បានអនុម័តច្បាប់ដែលបកស្រាយថា អាពាហ៍ពិពាហ៍ជា “ការចងសម្ព័ន្ធរវាងមនុស្ស២នាក់” គឺមិនគ្រាន់តែ “រវាងប្រុសនិងស្រី” ប៉ុណ្ណោះទេ។
ហើយទើបម្សិលមិញសោះ សភាអង់គ្លេសដោយសម្លេងគាំទ្រចំនួនដល់ទៅ ៤០០ ទល់នឹង សម្លេងជំទាស់តែ ១៧៥ បានអនុម័តច្បាប់ ដែលបើកផ្លូវដល់ការរៀបការរវាងមនុស្សភេទ ដូចគ្នា។
ទាក់ទងនឹងរឿងសុំកុមាររុស្ស៊ីយកទៅធ្វើជាកូនចិញ្ចឹម លោកប្រធានសភាឌូម៉ា Serguei Naryshkine ដែលកំពុងបំពេញទស្សនកិច្ចការងារ នៅក្រុងប៉ារីស បានថ្លែងល្ងាចថ្ងៃទី៥ កុម្ភៈ ទៅកាន់ពួកអ្នកកាសែតនៅទីនោះថា ក្រោយពីបារាំងបានអនុម័តច្បាប់បើកផ្លូវឲ្យមាន ការរៀបអាពាហ៍ពិពាហ៍រវាងមនុស្សភេទដូចគ្នា ភាគីរុស្ស៊ីអាចកែប្រែចំណុចខ្លះនៃកិច្ចព្រមព្រៀងចុះជាមួយបារាំង កាលពីថ្ងៃទី៣០ កក្កដា ឆ្នាំ២០១២ ស្តីអំពីការអនុញ្ញាតឲ្យគ្រួសារបារាំងទទួលកុមារកំព្រារុស្ស៊ី យកទៅធ្វើជាកូនចិញ្ចឹម៕ ដោយ កែវ ឆាយា(RFI)
