នារីម្នាក់មានវិបត្តិស្នេហ៍ដាច់ចិត្តចងកសម្លាប់ខ្លួន
ភ្នំពេញ៖ កាលពីវេលាម៉ោង ៦៖២០នាទីល្ងាចថ្ងៃទី៥ ខែកុម្ភះ នារីវ័យ២០ឆ្នាំ និងធ្វើការរោងចក្រកាត់ដេរ ត្រូវបានមិត្តភក្តិរបស់នាង ប្រទះឃើញចងក និងបង្អូច ស្លាប់ ស្ថិតនៅ បន្ទប់ជួលលេខ១៩ ផ្លូវលេខ ២០៣ ក្រុមទី៣ ភូមិត្នោតជ្រុំ៤ សង្កាត់បឹងទំពុន ខណ្ឌមានជ័យ។
សេចក្តីរាយការណ៍ ពីសាក្សីនៅ កន្លែងកើតហេតុ បានឲ្យដឹងថា ជនរងគ្រោះ ដែលចងក សម្លាប់ខ្លួន ខាងលើនេះ មានឈ្មោះ យ៉ាន់ សេងហ៊ួរ អាយុ២០ឆ្នាំ មានស្រុកកំណើត នៅភូមិតាអី ឃុំបាស្រែ ស្រុកអង្គរបូរី ខេត្តតាកែវ ហើយបច្ចុប្បន្ន ជាកម្មការិនីកាត់ដេរ។
សាក្សីបានបន្តថា មុនពេលកើតហេតុ នារីរងគ្រោះដែល ជួលផ្ទះ នៅជាមួយមិត្តភក្តិនោះ បាននៅតែម្នាក់ឯង ពីព្រោះមិត្តភក្តិបានចេញ ទៅក្រៅអស់ហើយ។ លុះដល់ម៉ោង កើតហេតុ នៅពេលមិត្តភក្តិ ត្រឡប់មកវិញ ហើយចាក់ទ្វារចូលទៅ ស្រាប់តែឃើញ ជនរងគ្រោះ ចងក ដោយយកក្រមា ចងនឹងបង្អូច ស្លាប់បាត់ទៅហើយ។
ក្រោយកើតហេតុ សមត្ថកិច្ច មូលដ្ឋាន និងសមត្ថកិច្ចជំនាញ បានចុះទៅ កន្លែងកើតហេតុ ហើយធ្វើការ ត្រួតពិនិត្យ ដោយអះអាងថា ជនរងគ្រោះពិតជា ស្លាប់ដោយសារតែ អំពើអត្តឃាតមែន ។
សមត្ថកិច្ចបានបន្តថា ការធ្វើអត្តឃាត របស់ជនរងគ្រោះ គឺទាក់ទង និងវិបត្តិស្នេហា ដោយជនរងគ្រោះ បានបន្សល់លិខិតមួយ ច្បាប់ ជូនសង្សារបស់ខ្លួន។ យ៉ាងណាក៏ដោយ សមត្ថកិច្ចមិនទាន់បាន បង្ហាញលិខិតស្នេហានោះទេ៕
ដោយ៖ ហេង នាង
