ជនសង្ស័យធ្វើសកម្មភាពឆក់កាបូបជនបរទេសម្នាក់ត្រូវសមត្ថកិច្ចចាប់ខ្លួន
ភ្នំពេញ៖ កាលពីវេលាម៉ោង៨និង១០នាទីព្រឹក ថ្ងៃទី ២២ ខែមករា ជនសង្ស័យម្នាក់ដែលធ្វើសកម្មភាពឆក់កាបូបជនបរទេសម្នាក់កំពុងជិះម៉ូតូកង់បី នៅលើកំណាត់ផ្លូវប៉ាស្ទ័រជាប់របងវិទ្យាជាតិអប់រំ ត្រូវសមត្ថកិច្ចចាប់ខ្លួននៅចំណុចក្បែរភ្លើងស្តុបបូកគោផ្លូវលេខ ៧១ សង្កាត់បឹងកេងកងទី១ ខណ្ឌចំការមន។
ជនសង្ស័យដែលសមត្ថកិច្ចស្ទាក់ចាប់បានមានឈ្មោះ សុង វិទូ ភេទប្រុស អាយុ២៨ឆ្នាំ មុខរបរមិនពិតប្រាកដ ស្នាក់នៅភូមិកោះដាច់ខណ្ឌប្ញស្សីកែវ ជិះម៉ូតូម៉ាកហុងដាសេ១២៥ ស៊េរី២០១២ ពាក់ស្លាកលេខភ្នំពេញ 1BF-8520 ត្រូវបានសមត្ថកិច្ចនគរបាលបញ្ជូនមកអធិការដ្ឋានខណ្ឌចំការមន ដើម្បីសាកសួរបន្ដ ។
សមត្ថកិច្ចបន្តថា នៅក្នុងកាបូបរបស់ស្ត្រីរងគ្រោះមានទូរស័ព្ទដៃ លុយនិងសម្ភារ:មួយចំនួន ហើយបានប្រគល់ជូនជនរងគ្រោះវិញ។ បច្ចុប្បន្នជនសង្ស័យត្រូវបាន ឃុំខ្លួននៅអធិការដ្ឋាននគរបាលខណ្ឌចំការមន ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមនីតិវិធីច្បាប់៕
ដោយ៖ ហេង នាង