អាជីករលក់មាសនៅផ្សារថ្មីត្រូវក្រុមចោរប្រដាប់អាវុធប្លន់យកទ្រព្យសម្បត្តិអស់ជាង ១០០០០ដុល្លារ
ភ្នំពេញ ៖ កាលពីព្រឹកព្រលឹមថ្ងៃទី ២០ខែមករា ក្រុមចោរប្រដាប់អាវុធចំនួន ពីរនាក់ស្លៀកពាក់ស៊ីវិល ជិះម៉ូតូមួយគ្រឿង បានធ្វើសកម្មភាពចូលវាយប្លន់ យកទ្រព្យសម្បត្តិពីស្ត្រីម្នាក់ នៅក្នុងផ្ទះលេខ១៣ ផ្លូវលេខ ១៤២ សង្កាត់ផ្សារថ្មី ទី ១ ខណ្ឌដូនពេញ។
ទាក់ទិននឹងករណីប្លន់ប្រដាប់អាវុធខាងលើនេះសាក្សីដែលបានឃើញ ហេតុការណ៍បានឲ្យដឹងថាមុនពេលកើតហេតុនោះគេសង្កេតឃើញក្រុមចោរ ប្រដាប់អាវុធចំនួនពីរនាក់ ស្លៀកស៊ីវិល ជិះម៉ូតូមួយគ្រឿងម៉ាកស្មាស មកឈប់នៅផ្ទះកើតហេតុ រហូតពេលដែលស្ត្រីរងគ្រោះជាម្ចាស់ផ្ទះបានបើកទ្វារផ្ទះក្នុងបំណង ដាក់តាំងសម្ភារៈ លក់ដូចធម្មតា នោះស្រាប់តែជនប្រដាប់អាវុធម្នាក់កាន់កាំភ្លើងខ្លីម៉ាក K 59 មួយដើមចូលទៅវាយក្បាលស្ត្រីរងគ្រោះ បណ្ដាលឲ្យរងរបួសដួលទៅនឹងដី ក្រោមមកក្រុមចោរក៏បានស្ទុះរត់ទៅយកស្បោង ដាក់ប្រាក់ និងលុយ យករត់ចេញទៅក្រៅជិះម៉ូតូរត់គេចខ្លួនបាត់ដោយសុវត្ថិភាពតែម្ដងទៅ ។
ស្ត្រីរងគ្រោះដែលក្រុមចោរវាយឲ្យរងរបួសខាងលើនេះមានឈ្មោះ ធា ទីក ភេទស្រី អាយុ ៣៧ ឆ្នាំ បានឲ្យដឹងថាចោរប្លន់យកប្រាក់របស់គាត់អស់ជាង ១០០០០ដុល្លារ និងចិញ្ចៀនពេជ្រ ៨ វង់ និងបន្តោងខ្សែក ២វង់ ។
បច្ចុប្បន្នសមត្ថកិច្ចកំពុងធ្វើការសាកសួរជនរងគ្រោះដើម្បីកំណត់ មុខសញ្ញាតាមចាប់ខ្លួនជនល្មើសយកមកផ្ដន្ទាទោសតាមផ្លូវច្បាប់៕
ដោយ៖ ហេង នាង
