ចិនច្រឡោតខ្លាំងដាក់អាមេរិកដែលគាំទ្រជប៉ុនក្នុងជម្លោះប្រជុំកោះសេនកាគូ ឬទាវយូ
នៅថ្ងៃអាទិត្យទី ២០ មករា ឆ្នាំ២០១៣នេះ ក្រសួងការបរទេសចិន បានប្រកាសកំហឹង ជាផ្លូវការ ប្រឆាំងនឹងប្រសាសន៍របស់លោកស្រីគ្លីនតុន ដែលបានថ្លែងគាំទ្រជប៉ុន ក្នុងបុព្វហេតុការពារបូរណភាពដែនប្រជុំកោះសេនកាគូ ជាប់ជម្លោះជាមួយចិន។
នៅក្នុងសេចក្តីជូនដំណឹងរបស់ក្រសួងការបរទេស ចិនបានប្រកាសយ៉ាងក្តែងៗ និងដោយគ្មានញញើតញញើម ប្រឆាំងដាច់ខាតនឹងចំណាប់អារម្មណ៍របស់លោក ស្រីប្រមុខការទូតអាមេរិក ហ៊ីលឡារី គ្លីនតុន។ អ្នកនាំពាក្យការទូតចិនបានថែមទាំងបង្ខំឱ្យសហរដ្ឋអាមេរិក គិតគូរឡើងវិញ ប្រកបដោយលក្ខណៈទទួលខុសត្រូវ ចំពោះសំណុំរឿងប្រជុំកោះទាវយូនេះ។
លោកស្រីហ៊ីលឡារី គ្លីនតុន ដែលកាលពីថ្ងៃសុក្រ ក្នុងឱកាសទទួលជួបសមភាគីជប៉ុន លោក ហ្វូម្យូ គីស្ហ៊ីដា (Fumio Kishida) នៅទីក្រុងវ៉ាស៊ីនតោន បានរំលឹកបញ្ជាក់ថា “ទោះបីអាមេរិកមិន ប្រកាន់យកជំហរណាមួយជុំវិញជម្លោះដណ្តើមប្រជុំកោះរវាងចិនជប៉ុន ហើយទោះបីអាមេរិកទទួលស្គាល់ថា ប្រជុំកោះ សេនកាគូស្ថិតក្រោមរដ្ឋបាលជប៉ុនក៏ដោយ ក៏អាមេរិកប្រឆាំងដាច់ខាតរាល់សកម្មដែលវាយប្រហារឥតឈប់ឈរលើការ គ្រប់គ្រងរបស់ជប៉ុន”។
តាំងពីម្សិលមិញមក សារព័ត៌មានផ្លូវការចិនបានរិះគន់ចំៗ អាមេរិកដែលគាំទ្រអ្នកស្តាំនិយមជប៉ុន និងបានចាត់ទុកអាមេរិកថាកំពុងតែក្បត់នឹងពាក្យសំដីដែលធ្លាប់ តាំងខ្លួនជាអ្នកអព្យាក្រិត ក្នុងសំណុំរឿងជម្លោះប្រជុំកោះ សេនកាគូ ឈ្មោះជាភាសាជប៉ុន ឬទាវយូ សម្រាប់ចិន។ កោះគ្មានមនុស្សរស់នៅ តែសម្បូរធនធានធម្មជាតិ។
ជម្លោះនៅក្នុងសមុទ្ទចិនខាងកើត ដែលអូសបន្លាយតាំងពីយូរយារមកហើយ បានធ្វើឱ្យប៉េកាំង និងតូក្យូ តានតឹងដាក់គ្នាកាន់តែខ្លាំង រហូតក្លាយជាការវាយប្រហារគ្នាជាពាក្យសម្តី និងជាការបញ្ជូននាវាល្បាត ស្ទើរជារៀងរាល់ថ្ងៃ និងបានផ្ទុះឡើងខ្លាំងជាថ្មី តាំងពីខែកញ្ញាមក ដោយហេតុតែអាជ្ញាធរជប៉ុនបានប្រមូលទិញកោះខ្លះមកធ្វើជាសម្បត្តិ រដ្ឋ៕ដោយ អៀង សុខម៉ិញ (RFI)