សកម្មជនចលនាអាវក្រហមថៃមួយរូប ជាប់ទោសពីរឆ្នាំក្នុងពន្ធនាគារ ពីបទប្រមាថព្រះមហាក្សត្រ
តុលាការ ឧក្រិដ្ឋ ក្រុងបាងកកថៃ បានសំរេចដាក់ទោស សកម្មជនចលនាអាវក្រហមថៃមួយរូប ឈ្មោះ Yosawaris Chuklom ហៅ Jeng Dokchik អោយជាប់ពន្ធនាគារ រយៈពេលពីរឆ្នាំ ពីបទប្រមាថព្រះមហាក្សត្រថៃ ធ្វើឡើងកាលពីជាងពីរឆ្នាំមុន។ នេះបើយោងតាម មេធាវីរបស់ លោក Jeng Dokchik ប្រាប់អោយដឹង នៅថ្ងៃព្រហស្បត្តិ៍នេះ។ លោក Jeng មានអាយុ ៥៤ ឆ្នាំ ជាអតីតសិល្បករ មួយរូប នៅថៃ ធ្លាប់បានធ្វើសេចក្តីថ្លែងការ នយោបាយ ដែលឈានទៅដល់ការប្រមាថ ព្រះមហាក្សត្រ កាលពីឆ្នាំ ២០១០ នៅពេលដែល ចលនាអាវក្រហមថៃ កាន់កាប់ទីក្រុង អស់រយៈពេល ពីរខែ។ លោក ក៏ត្រូវជាប់ប្រកាន់ ក្នុងសំណុំរឿងដាច់ដោយឡែកមួយទៀត ពីបទថាបានបង្កភេរវកម្ម ក្នុងស្រុកផងដែរ។
ក្នុងបទប្រមាថ ព្រះមហាក្សត្រថៃនេះ លោក ចឹង ដុកជីក ធ្លាប់បានទទួលទោសរួចម្តងមកហើយ អោយជាប់ពន្ធនាគារ រយៈពេល បីឆ្នាំ។ ប៉ុន្តែ តុលាការថៃ បានបន្ថយទោស មកនៅត្រឹមតែ ពីរឆ្នាំវិញ ដោយសារ តែលោកបានសហការជាមួយតុលាការ។ លោក ចឹង បានប្តឹងតវ៉ាដល់សាលាឧទ្ធរណ៍ ហើយបានសុំនៅក្រៅឃុំ ដោយយល់ព្រមបង់ប្រាក់ធានា។
អតីតសិល្បករថៃរូបនេះជាសកម្មជននៃចលនាអាវក្រហមថៃ ដែលគាំទ្រដល់នយោ បាយ របស់អតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រា។ លោក ចឹង ធ្លាប់បានធ្វើសេចក្តីថ្លែងការនយោបាយ ឈានទៅដល់ការប្រមាថព្រះមហក្សត្រថៃ កាលពីឆ្នាំ ២០១០ នៅពេលដែល ចលនាអាវក្រហមថៃ កាន់កាប់ទីក្រុងបាងកក អស់រយៈពេល ពីរខែ មុននឹងយោធាថៃធ្វើការបង្ក្រាប។ វិបត្តិនយោបាយ នៅពេលនោះ បានបង្កអោយមានមនុស្សស្លាប់ ៩០នាក់ និងរបួស ១៩០០នាក់។ លោក ចឹង ក៏ត្រូវជាប់ប្រកាន់ ក្នុងសំណុំរឿងដាច់ដោយឡែកមួយទៀត ពីបទថាបានបង្កភេរវ កម្ម ក្នុងស្រុកផងដែរ។
នៅចំពោះមុខនយោបាយក្នុងប្រទេស ដែលមានលក្ខណៈប្រែប្រួល មិនទៀងទាត់ រាជវង្សថៃ បានក្លាយជាប្រធានបទមួយ ដែលឆាប់ទទួលរងនូវការប៉ះពាល់ ផ្នែកអារម្មណ៍។
ចាប់តាំងឆ្នាំ ២០០៦ មក ក្រោយពីមានរដ្ឋប្រហារទំលាក់ អតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រា ដែលបញ្ញវន្តថៃ ចាត់ទុកថា ជាតំណាងគ្រោះថ្នាក់ដល់រា ជានិយម ការដាក់ទោសលើ អ្នកដែលប្រមាថព្រះមហាក្សត្រ កាន់តែមានច្រើនឡើង។
បើទោះជារដ្ឋាភិបាលថៃបច្ចុប្បន្ន ស្ថិតនៅក្រោមការគ្រប់គ្រង របស់ប្អូនស្រី លោក ថាក់ស៊ីន ជាងមួយឆ្នាំ កន្លះមកហើយក៏ដោយ ក៏ស្ថានការណ៍ក្នុងស្រុក ហាក់មិនបានវិវត្តន៍ទៅមុខនៅឡើយ៕ដោយ ព្រំ សឿន សូលីណា (RFI)