ស្ត្រីវ័យចំណាស់ម្នាក់ត្រូវម៉ូតូបុកដួលបោកក្បាលរងរបួសធ្ងន់
ភ្នំពេញ៖ កាលពីវេលាម៉ោង ២០និង០០នាទីយប់ ថ្ងៃទី១៧ ខែមករា ស្ត្រីវ័យចំណាស់ម្នាក់ ត្រូវរងរបួសយ៉ាងធ្ងន់ ធ្ងរ ក្នុងខណៈពេលដែល ក្មេងស្ទាវ២នាក់ ជិះម៉ូតូបុក នៅចំណុចផ្លូវម៉ៅសេទុង ក្នុងសង្កាត់បឹងកេកងទី១ ខណ្ឌចំការមន។
សាក្សីនៅកន្លែងកើតហេតុបានឲ្យដឹងថា មុនពេលកើតហេតុគេសង្កេតឃើញ ក្មេងស្ទាវពីរនាក់ ជិះម៉ូតូវីវ៉ាមួយគ្រឿង ក្នុងល្បឿនលឿន តាមបណ្ដោយមហាវិថីម៉ៅសេទុង ក្នុងទិសដៅពីលិចទៅកើត លុះមកដល់ចំណុចផ្លូវកែងលេខ៧១ក៏បានជ្រុលល្បឿន បុកស្ត្រីវ័យចំណាស់ម្នាក់ ដែលកំពុងជិះម៉ូតូសង់កូរ៉េមួយគ្រឿងចេញពីផ្លូវ៧១ ដែលបណ្ដាលឲ្យម៉ូតូទាំងពីរគ្រឿងដួលគរពីលើគ្នា នៅលើថ្នល់ ចំណែកឯស្ត្រីជាម្ចាស់ម៉ូតូសង់កូរ៉េ ដួលបោកក្បាលនឹងថ្នល់រងរបួសធ្ងន់ធ្ងរ ត្រូវបញ្ជូនទៅសង្គ្រោះនៅមន្ទីរពេទ្យកាល់ម៉ែត្រ។
ក្រោយពីកើតហេតុ សមត្ថកិច្ចនគរបាលចរាចរខណ្ឌចំការមន បានចុះមកវាស់វែង អូសយកម៉ូតូទាំងពីរគ្រឿង ទៅរក្សាទុកនៅអធិការដ្ឋានខណ្ឌចំការមន ដើម្បីចាត់ការតាមច្បាប់៕
ដោយ៖ ហេង នាង