កម្ពុជាខ្វះកម្លាំងពលកម្ម ដើម្បីបំពេញតម្រូវការទីផ្សារការងារក្នុងស្រុក
ភ្នំពេញ៖ នៅក្នុងឱកាសបើកសិក្ខាសិលាស្តីពីការកសាងភាពជាដៃគូរវាងវិស័យសាធារណៈ និងវិស័យឯកជន នៅ ក្នុងការអភិវឌ្ឍ TVET នៅព្រឹកថ្ងៃទី១៦ ខែមករា ឆ្នាំ២០១៣នេះ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈលោក ពេជ សោភ័ន បានមានប្រសាសន៍ថា មានការវិនិយោគមកពីបរទេសច្រើន ដែលក្នុងនោះមកពីប្រទេស ចិន ជប៉ុន កូរ៉េ ហើយនិង ថៃ។ល។
លោករដ្ឋលេខាធិការបន្តថា ការវិនិយោនៅក្នុងប្រទេស គឺត្រូវការកម្លាំងពលកម្មជាច្រើន តែផ្ទុយទៅវិញកម្លាំងពលកម្ម នៅក្នុងស្រុក មានការខ្វះខាតទៅវិញ ដែលធ្វើឲ្យអ្នក វិយោគទុនមួយចំនួន មានការត្អួញត្អែរ អំពីការខ្វះខាតកម្លាំងពលកម្ម ដើម្បីបំពេញតម្រូវការការងារ នៅក្នុងរោងចក្ររបស់ពួកគេ។
លោករដ្ឋលេខាធិការបានបញ្ជាក់ថា « ចំនួនដែលយើងត្រូវការ គឺច្រើនណាស់ គ្រាន់តែខាងវិស័យកាត់ដេរ គឺរាប់ម៉ឺននាក់ ក៏ដូចជាវិស័យដែលវិនិយោគ ថ្មីៗ ពិសេសគឺខាងជប៉ុន ដែលខ្ញុំបានធ្វើការជាមួយហ្នឹង គាត់ត្រូវការច្រើនណាស់ ហើយយើងរើសមិនទាន់គ្រប់ឲ្យគេផង។ ដូច្នេះបានសេចក្តីថា សព្វថ្ងៃនេះនៅកម្ពុជាយើង អត់មានខ្វះទេការងារ ប៉ុន្តែខ្វះមនុស្សទៅធ្វើការ»។
គួរបញ្ជាក់ផងដែរថា ពលករខ្មែរភាគច្រើន បាននាំគ្នាទៅធ្វើការងារ នៅក្រៅប្រទេស ដោយសារតែពួកគេយល់ឃើញថា លក្ខខណ្ឌការងារនៅក្រៅ ប្រទេសល្អ ហើយប្រាក់ចំណូលបានខ្ពស់ ជាងនៅក្នុងប្រទេស។ តែផ្ទុយទៅវិញពួកគេមួយចំនួន ក៏ត្រូវបានថៅកែកេងប្រវ័ញ្ច កម្លាំងពលកម្មការងារ ហើយអាចឈាន ទៅដល់ការជួញដូរមនុស្សទៅវិញ៕
