បុរសម្នាក់បានរងរបួសធ្ងន់ ខណៈជិះម៉ូតូត្រូវរថយន្តបុក
ភ្នំពេញ៖ កាលពីវេលាម៉ោង១និង១០នាទីយប់ ថ្ងៃទី១៦ ខែមករា បុរសម្នាក់បានរងរបួសធ្ងន់ ខណៈពេលដែល ជិះម៉ូតូ ហើយត្រូវរថយន្តមួយគ្រឿង បើកលឿនបុកចំពីមុខពេញទំហឹងនៅ តាមបណ្តោយមហាវិថីព្រះសុធារស កែងមហាវិថីព្រះសីហនុ ក្នុងសង្កាត់ទន្លេបាសាក់ ខណ្ឌចំការមន ។
ប្រភពព័៌មានពីកន្លែងកើតហេតុបានឲ្យដឹងថាមុនពេលកើតហេតុ គេសង្កេតឃើញបុរសជនជាតិបរទេសម្នាក់បានបើករថយន្តមួយគ្រឿង ម៉ាកកាមរីឆ្លាម ពណ៌ទឹកប្រាក់ បើកបរតាមបណ្តោយមហាវិថីព្រះសុធារស ក្នុងទិសដៅពីជើងទៅត្បូង ដោយល្បឿនលឿន លុះពេលមកដល់ចំណុចផ្លូវកែងមហាវិថីព្រះសីហនុ រថយន្តបានរេចង្កូតជ្រុលល្បឿន បុកទៅម៉ូតូម៉ាកសេ១២៥ ពណ៌ខ្មៅមួយគ្រឿង ដែលកំពុងជិះក្នុងទិសដៅបញ្ច្រាសទិសគ្នា ខណៈម៉ូតូកំពុងបត់ស្តាំឆ្លងទៅរង្វង់មូលសម្តេចជួនណាតក៏ត្រូវ រថយន្តបង្កហេតុបុកចំពីមុខពេញទំហឹងតែម្តង បណ្តាលឲ្យបុរសអ្នកជិះម៉ូតូត្រូវរងរបួសធ្ងន់ធ្ងរនិងម៉ូតូរបស់ ជនរងគ្រោះ រួមទាំងរថយន្តបង្កហេតុត្រូវរងការខូចខាតស្ទើទាំងស្រុង ។
ក្រោយកើតហេតុសមត្ថកិច្ចនគរបាលមូលដ្ឋាន និងនគរបាលចរាចរណ៍ខណ្ឌចំការមន បានចុះមកវាស់វែង និងត្រួតពិនិត្យដល់កន្លែងកើតហេតុ និងបាននាំយករថយន្តបង្ក និងម៉ូតូរបស់ជនរងគ្រោះ យកទៅរក្សាទុកនៅអធិការដ្ឋានខណ្ឌចំការមនរងចាំដោះស្រាយតាមផ្លូវច្បាប់ ៕
ដោយ៖ ហេង នាង
