ជនសង្ស័យម្នាក់ត្រូវសម្ថកិច្ចឃាត់ខណៈកំពុងធ្វើសកម្មភាពលួចកាច់ក ម៉ូតូ
ភ្នំពេញ ៖ កាលពីវេលាម៉ោង១៥:១០នាទី ថ្ងៃទី១៣ ខែមករា នគរបាលព្រហ្មទណ្ឌខណ្ឌទួលគោក សហការជាមួយនិងប៉ូលិលមូលដ្ឋានប៉ុស្តិ៍ទឹកល្អក់ទី ២ ធ្វើការឃាត់ខ្លួនជន សង្ស័យម្នាក់បានភ្លាមៗតែម្តង ក្នុងខណៈដែលជនសង្ស័យបានធ្វើសកម្មភាពលួចកាច់កម៉ូតូរបស់ប្រជាពលរដ្ឋ នៅចំណុច ក្រុមហ៊ុន R G B ( ក្រុមហ៊ុនថតបង្ហាញម៉ូត ) ដែលមានទីតាំងនៅផ្ទះលេខ១៦៦ ផ្លូវលេខ១៥០ ក្រុមទី៦ ភូមិ៣ សង្កាត់ទឹកល្អក់ទី២ ខណ្ឌទួលគោក ។
ជនសង្ស័យដែលសមត្ថកិច្ចឃាត់ខ្លួនខាងលើនេះមានឈ្មោះ សុខ សុភ័ក្ត្រ ហៅ ម៉ៅ ភេទប្រុស អាយុ ៣២ឆ្នាំ ជនជាតិខ្មែរ មុខរបរ ពុំពិតប្រាកដ ស្នាក់នៅផ្ទះជួលគ្មានលេខ ផ្លូវលំ ភូមិត្រពាំងឈូក សង្កាត់ទឹកថ្លា ខណ្ឌសែនសុខ ។
ប្រភពព័មានបានឲ្យដឹងថា មុនពេលកើតហេតុ ជនរងគ្រោះឈ្មោះ អេង សាយ បានជិះម៉ូតូ ម៉ាក Honda C125 ពណ៌ខ្មៅ ស៊េរី2004 ពាក់ស្លាកលេខភ្នំពេញ 1E-2758 មកចតទុកនៅក្នុងបរិវេនក្រុមហ៊ុន R G B ដោយពុំបានដកកូនសោរចេញ លុះចេញមកវិញស្រាប់តែបាត់ ម៉ូតូ ជនរងគ្រោះក៏ស្ទុះចេញមើលក្រៅរបងមើល បានឃើញជនសង្ស័យ កំពុងអូសម៉ូតូចេញបានប្រហែលជាង ១០ម៉ែត្រ ជនរងគ្រោះស្រែកចោរៗ ជនសង្ស័យ បានផ្តួលម៉ូតូចោល ហើយព្យាយាមរត់គេចខ្លួន ភ្លាមនោះកំលាំងសមត្ថកិច្ចនគរបាលប៉ុស្តិ៍ទឹកល្អក់ទី២ ដែលកំពុងល្បាតការពារសុវត្ថិភាពនៅក្នុងមូលដ្ឋាន បានដេញតាមជនសង្ស័យទាន់នៅចំណុចផ្លូវលេខ១៣២ហ្សេត សង្កាត់ទឹកល្អក់ទី១ ខណ្ឌទួលគោក ក៏ធ្វើការឃាត់ខ្លួនជាក់ស្តែងតែម្តង។
នៅចំពោះមុខសមត្ថកិច្ចជនសង្ស័យបានឆ្លើយសារភាពថាខ្លួនពិតជាបាន ប្រព្រឹត្តបទល្មើសនេះ ពិតប្រាកដមែន ។ បច្ចុប្បន្នសមត្ថកិច្ចបានកសាងសំណុំរឿងបញ្ជូនទៅកាន់ សាលាដំបូងរាជធានីភ្នំពេញដើម្បីចាត់ការតាមផ្លូវច្បាប់៕
ដោយ៖ ហេង នាង
