សហគមន៍មានជម្លោះដីធ្លី ជំរុញក្រសួងមហាផ្ទៃណែនាំមន្ត្រីពន្ធនាគារខ្លួនមួយរូប
នៅថ្ងៃទី១៤ ខែមករានេះ ក្រុមអ្នកមានជម្លោះដីធ្លីទំាងនោះ មកពីតំបន់បឹងកក់ និងអតីតបុរីកីឡា ប្រមាណជិត ៦០នាក់ បានប្រមូលផ្តុំគ្នាតវ៉ា នៅមុខក្រសួងមហាផ្ទៃ សុំអន្តរាគមន៍ពីរដ្ឋមន្ត្រីក្រសួងមហាផ្ទៃលោក ស ខេង ករណីអគ្គនាយកនៃអគ្គនាយកដ្ឋានពន្ធនាគារ លោក គុយ ប៊ុនសន ប្រើពាក្យមិនសមរម្យ ដោយពួកគេថា លោក គុយ ប៊ុនសន បានប្រាប់ប្រព័ន្ធផ្សព្វផ្សាយក្នុងស្រុកថា អ្នកតវ៉ាជាមនុស្សអគតិ។
ក្រុមអ្នកមានជម្លោះដីធ្លី ឲ្យដឹងទៀតថា រដ្ឋមន្ត្រីក្រសួងមហាផ្ទៃ លោក ស ខេង គួរផ្តល់ដំបូន្មាន ដល់មន្ត្រីរូបនោះ ដើម្បីជាគំរូដល់មន្ត្រីដទៃទៀត ឲ្យចេះគោរក្រមសីលធម៌មន្ត្រីរាជការ និងចេះគោរពម្ចាស់ឆ្នោត ដែលជាអ្នកផ្តល់ប្រាក់ខែដល់មន្ត្រីរាជការគ្រប់រូប ។
លោក គុយ ប៊ុនសន បានបដិសេធនឹងប្រតិកម្មរបស់អ្នកភូមិនេះ ដោយអះអាង លោកមិនបានប្រើពាក្យដូចការចោទប្រកាន់ទេ។ លោកថា ទង្វើរបស់អ្នកភូមិនៅពេលនេះ ធ្វើឡើងតាមរូបភាពញុះញង់ ដើម្បីទម្លាក់កំហុសមកលើរូបលោក។
ក្រៅពីណាក់ញត្តិទៅសុំឲ្យលោក គុយ ប៊ុនសន កែតម្រូវពាក្យពួកគេក៏សុំឲ្យក្រសួងមហាផ្ទៃអន្តរាគមន៍ ជួយជំរុញទៅស្ថាប័នពាក់ព័ន្ធឲ្យពន្លឿន ចុះបោះព្រំដីនៅតំបន់មានជម្លោះ តាមអនុក្រឹត្យរបស់នាយករដ្ឋមន្ត្រី ដើម្បីបញ្ចាប់ជម្លោះ និងដោះលែងតំណាងពួកគេ គឺអ្នកស្រី យ៉ោម បុប្ផា ដែលកំពុងជាប់ពន្ធនាគារ៕
