ឥណ្ឌាសម្រេចបង្កើតច្បាប់កាត់ទោសប្រហារជីវិតជនល្មើសរំលោភកុមារ
សារព័ត៌មាន Cambodia News/
ឥណ្ឌា ៖ រដ្ឋាភិបាលឥណ្ឌាបានសម្រេចយល់ព្រមអនុម័តច្បាប់ថ្មីមួយគឺ ការកាត់ទោសប្រហារជីវិតចំពោះជនល្មើសដែលរំលោភសេពសន្ថវៈលើអនីតិជនក្រោមអាយុ១២ឆ្នាំ។ នេះបើយោងតាមការចេញផ្សាយដោយសារព័ត៌មាន BBC។
នាយករដ្ឋមន្ត្រីឥណ្ឌា លោក Narendra Modi បានប្រកាសហៅគណៈរដ្ឋមន្ត្រីប្រជុំសម្រេចការអនុម័តច្បាប់នេះកាលពីថ្ងៃទី២១ ខែមេសា ឆ្នាំ២០១៨ បន្ទាប់ពីមានការផ្ទុះកំហឹងពេញប្រទេសអំពីករណីរំលោភសម្លាប់ក្មេងស្រីអាយុ៨ឆ្នាំជាជនជាតិអ៊ីស្លាមម្នាក់ ដោយបុរសមួយក្រុមកាន់សាសនាហិណ្ឌូ នៅក្នុងរដ្ឋ Jammu & Kashmir កាលពីពេលថ្មីៗកន្លងទៅ។
សូមជម្រាបថា កាលពីឆ្នាំ២០១៦ នៅប្រទេសឥណ្ឌាកើតមានករណីចាប់រំលោភចំនួនជិត ១៩០០០ករណី (ឬជាង ៥០ករណីក្នុង១ថ្ងៃ) កើនឡើងជិត ៨០០០ករណី បើធៀបនឹងឆ្នាំ២០១៥៕
