ជិះម៉ូតូទៅបុកម៉ូតូកង់បីសំណាងគ្មានអ្នករងរបួស
ភ្នំពេញ៖ កាលពីវេលាម៉ោង ២២ និង ៣០ នាទីយប់ថ្ងៃទី១០ ខែមករា ម៉ូតូគ្រឿង បើកក្នុងល្បឿនជ្រុលទៅបុកជាមួយនិងម៉ូតូរ៉ឺម៉កកង់បីពេញទំហឹង បណ្តាលឲ្យម៉ូតូដាច់កង់មុខខ្ទាត ចេញពីម៉ូតូរងការខូចខាតទាំងស្រុង ចំណែកម្ចាស់ម៉ូតូមិនមានរងរបួសទេ ស្ថិតនៅតាមបណ្តោយផ្លូវសុធារស សង្កាត់ទន្លេបាសាក់ ខណ្ឌចំការមន។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេសង្កេតឃើញមនុស្សពីរនាក់ ជិះម៉ូតូមួយគ្រឿងម៉ាកសេ ១២៥ ពណ៌ខ្មៅ ឌុបគ្នា តាមបណ្តោយផ្លូវសុធារស ក្នុងទិសដៅពីជើងទៅត្បូង លុះមកដល់ផ្លូវកែងព្រះសីហនុ ក៏បានបុកជាមួយម៉ូតូរ៉ឺម៉កកង់បីពេញទំហឹងបណ្តាល ឲ្យម៉ូតូសេ ១២៥ កង់មុខខ្ទាតចេញពីខ្លួនម៉ូតូ ហើយម៉ូតូត្រូវរងការខូចខាតទាំងស្រុងតែម្តង ចំណែកឯម៉ូតូកង់បីវិញមិនត្រូវរងការខូចខាតអ្វីទេ ។
បន្ទាប់ពីកើតហេតុភាគីខាងរ៉ឺម៉កកង់បីមិនបានទាមទារសំណងអ្វីពី ភាគីម៉ូតូសេ ១២៥ ឡើយដោយសារតែឃើញភាគីម៉ូតូត្រូវរងការខូចខាត ដោយភាគីទាំងពីរបានសម្រេចអូសយកម៉ូតូទៅជូសជុលរៀងៗខ្លួន ៕
ដោយ៖ ហេង នាង
